Read Sidama_Qullaawa _Maxaafa IYYOOBI 22 Bible Online

IYYOOBI 22 - Sidama_Qullaawa _Maxaafa bible

IYYOOBI 22

¹Temaanichu Elfaazino daware,

²«Halaalinta mannu Maganoho kaa'lannori nooni? Egennaamu nafa Maganoho ledannosiri nooni?

³Keeraanchimmakki Wo'manka Dandaanno Magano hagiirsiissannoni? Doogokki suwashsho ikkite isira ma leddannosi?

⁴Iso ayirrisoottoha ikkoommero rufannoheni? Yoote haa're shiqishannoheni?

⁵Kuni baalu coyi amadinohehu, lowo geeshsha busha ikkoottohuranna, cubbikki bati'rino daafiraati.

⁶Roduuwikkiwiinni amadote adhootto imaana gatisidhe, mulloota gatisoottonsa.

⁷Goodhinorira waa dihayikkisootto; hudidhinorira sagale diootto.

⁸Wolqakkinna roorrekki addaxxite wolu manni baatto, wolqatenni adhite umikkira halashshi'rootto.

⁹Huucci'ranni dayinoha, galte shii'rino meento mulla ha'risootto; anniweelo ooso gadadisootto.

¹⁰Woshshaado doyissitinohehunna, hedeweelchu masilli amadinohehu kunniraati.

¹¹La"attokki gede xawaabbu tunsicho ikkinohehunna, lolahu egemminohehuno kunniraati.

¹²«Maganu iima gordoho hee'rannoha di"ikkino? Iima noota nafa ikkituro, beeddaheno woro qole la"anno.

¹³Tenne affanni heedhenni, ‹Maganu ma afino? Kolishshu gordi giddo hee're yoo yee diafanno.

¹⁴Gordunna baatto qasidhinowa ha'ramanni, la"annokki gede kolishshu gordi golinosi› yaatto.

¹⁵«Bushu manni ha'ranno doogo, agura giwate murcidhella nootto?

¹⁶Insa yanni-male xoqolantannoreetiwe; lolahu diigino mini gede ikkitannoreeti.

¹⁷Wo'manka Dandaanno Maganono, ‹Assattonkeri dinona, ninkewiinni ho'li› yitanno.

¹⁸Minensa jiro wonshinohu isootina, tenne mayira heddannoro diafoommo!

¹⁹Bushu manni qorichishamanno woyite, danchu manni hagiidhanno; fayyaaleessu manni oso'lanno.

²⁰Bushu manni afi'nori baalu ba"anno; gatinohano giira ittanno.

²¹«Xaano ikkiro, Maganu ledo namoonte, keerunni hee'ri; hakkunni gedensaanni maassi'rannohe.

²²Maganu rosiisannohere macciishshi; qaalesino wodanikkira wodhi.

²³Wo'manka Dandaanno Maganiwa higittoro dhaawamatto; cubbo minikkinni hoo'littoro,

²⁴culkakki fushshite hunittoro, fila culkakkino lagaho tugge agurittoro,

²⁵Wo'manka Dandaanno Magani, culkanna lowo birra ikkannohe.

²⁶Hatte yannara, Wo'manka Dandaanno Maganinni tashshi yaannohe; hawaqidhe komo yiittokkinni isi widira higge la"a dandaatto.

²⁷Huucci'ratto woyite, isino macciishshannohe; atino xa'noottore uyi'ratto.

²⁸Hedoottori baalu qinaannohe; doogokki baalano xabbannohe.

²⁹Maganu boonaleeyye shollishanno; jooguulle kayinni gatisannonsa.

³⁰Ati fayyaaleessa ikkittoro, assoottorino gara ikkiro gatisannohe» yii.