Read Sidama_Qullaawa _Maxaafa IYYOOBI 28 Bible Online

IYYOOBI 28 - Sidama_Qullaawa _Maxaafa bible

IYYOOBI 28

¹Birra umme fushshinanniwinna, culka daashshine ximbiimbanniwi no.

²Siwiila baattote giddonni haa'nanni; camono kinchu giddonni daashshine fushshinanni.

³Siwiila giddo amadino kincho afi'rate, dhi'mote tunsichi giddora e'nanni; giddoyidi godi geeshsha iilline hasi'nanni.

⁴Mannu hee'ranno darginni fafe, lekkatenni kande egenninoonnikkiwa iillanno; hakkiicho qile bale ume, siibbate aana rarrae, callisi loosanno.

⁵Sagale baattote giddonni fultanno; giddoyidise kayinni, giira ittinohu gede ikke soorramanno.

⁶Kinnase giddonni xoxxorraamu dilqi fulanno; bushshise giddonni culka afi'nanni.

⁷Hakka massitanno doogo tillaallo diaffino; risu illerano dileeltanno.

⁸Waajjishanno moyichi lekkatenni dikadanno; doobbiichuno hakkaanni hige disa"anno.

⁹Mannu kaajjado kincho ume fushshe daddaranno; ilaallate hundi geeshsha iille umanno.

¹⁰Dilqa kincho hasi'ranni, kinna kurkure lulluqqinanni doogo qixxeessanno.

¹¹Wayi lolahannokki gede kofanno; maaxamino coyeno xawo fushshanno.

¹²Egenno kayinni maminni anfanniyya? Afa heedhannohu hiikkiichootiyya?

¹³Egenno tenne gobbara heedhannokki daafira, maricho kaa'litannoro mannu diafino.

¹⁴Diime, «Egenno ane giddo dino» yitanno; baaruno, «Anewa dino» yaanno.

¹⁵Egenno filu culkinni dianfanni; aye geeshshi woxe baanteno diafi'nanni.

¹⁶Egenno filu culkinninna, dilqu kinchinni roortanno.

¹⁷Culkunna ilku uduunnichi, ise geeshsha di"ikkanno; culkunni seekkinoonni irrinni hidhine dianfanni.

¹⁸Egenno baaru gami eleellenna, waajjo dilqu kinna roortanno.

¹⁹Baqqalu Itiyophiyunnihu dilqu kinchi egennotenni ditaalanno; filu culkinnino ditaashshinannise.

²⁰Egenno kayinni maminni anfanniyya? Afa heedhannohu mamaatiyya?

²¹Lubbotenni noo kalaqami baaluwiinni go'litinote; iima buubbanno ceano diaffannose.

²²Reyonna jeennaatu nafa, «Duduwose macciishshinoommota ikkinnina, illetenni dianfoommose» yitanno.

²³Egenno noowa massitanno doogo egenninohu Magano callaho; egenno noowa isi afino.

²⁴Maganu baattote qacce baala la"anno; gordoho woroonni noore baala afanno.

²⁵Bubbe mageeshshita ikka hasiissannosero hirqi yannaranna, wayi batinye bikki yannara,

²⁶xeena ganannowanna, beleqqanno banqo dirritannowa, hirqi yannara,

²⁷egenno hiittootero afino; qonqolche lae, danchummase egensiisino.

²⁸Maganu mannaho, «Kuneeti, Mooticha waajja egennote; bunshetewiinni fafano afate» yiino.