Read Sidama_Qullaawa _Maxaafa IYYOOBI 29 Bible Online

IYYOOBI 29 - Sidama_Qullaawa _Maxaafa bible

IYYOOBI 29

¹Iyyoobi lede coyi'ranni,

²«Xaa heeshsho'ya alba Maganu agareennae, hee'rummote gedeeta ikkitoommero woyyannoehu baino.

³Hatte yannara, tunsichu giddo noommo woyite, Maganu caabbichi ha'reemmo doogo kulinoe.

⁴Maganu gamba yee nooe waro, mine'ya agareenna, baalunkuri wo'meennae qawaaxxi're hee'roommo.

⁵Wo'manka Dandaanno Magani ledo'ya noo waro, ooso'ya gaangeessi're noommo yannara,

⁶buuro kakkaxxanni ha'reemmo; ejedhete zayite ilaalu hundi wayi gede lolakkannoe.

⁷Katamu gashshaano xaaddannowa, ledonsa songate mareemmo woyite,

⁸wedellu ane affe ka'a shiqqi yitanno; geerruno ane ayirrisse ofoltino darginni shootti yitanno.

⁹Hasaabbanni noori gosate albisooti, ane affuro coyi'ra agurte sammi yitanno.

¹⁰Gobbate jajjabbi nafa, ane affanno woyite coyidhe diaffanno.

¹¹«Anere macciishshinohunna afinoehu baalu, ane jajanni coyi'ranno.

¹²Konne assitinohuno, kaa'lote raaranno qarraataamonna, towatannohu nookki anniweeloota kaa'loommohuraati.

¹³Reyote gambissinori kaa'leennansa maassidhinoe; galte shii'rino meenti kaa'leennansa hagiidhino.

¹⁴Mannaho shaqqanna taalo coye assa, wo'manka woyite roso'yaati.

¹⁵Ani ballicha massagoommo; naafichano irkisoommo.

¹⁶Buxichoho anna ikkoommo; manni gobba mannirano halamoommo.

¹⁷Kaajjaddu wolqa cancane, gawajjamino manna angansanni gatisoommo.

¹⁸«Ani wodani'yanni, ‹Diro furme, mine'ya hee're dancha reyo reemmo› yee hedoommo.

¹⁹Hakka waro ani, rumushshisi wayi gama noohunna, wo'manka woyite sinnasi lojje heedhanno haqqichi gedeeho.

²⁰Wo'manka woyite ayirre hee'roommo; wolqa bae diegennoommo.

²¹Ani coyi'reemmo woyite, mannu sammi yee macciishshe seejjo'ya adhanno.

²²Coyi'roommori wodanaho coanno daafira, ane gedensaanni mittuno lede dicoyi'ranno.

²³Xeena agadhinannihu gede agadhitannoe; loosi'rannohu badheessi xeena hasi'rannohu gede hasidhannoe.

²⁴Waajjitanno woyite alba hisateemmonsa; albi'ya hisatanno woyiteno jawaante afidhanno.

²⁵Sooreessa ikke doogo kuloommonsa; moote olantosira albaanni hige ha'rannohu gede ikke albisoommonsa; dadillitanno woyite jawaachishoommonsa.