Read Sidama_Qullaawa _Maxaafa IYYOOBI 30 Bible Online

IYYOOBI 30 - Sidama_Qullaawa _Maxaafa bible

IYYOOBI 30

¹«Xa kayinni, ilama anewa dagginokkiri arrassitannoe; annuwansa, ge'reewo'ya agaranno woshsha kaa'late nafa diwodheemmoreeti.

²Wolqa afidhinokkirenna jaabbinore ikkitinohura, anera mittoreno diba'raassinoereeti.

³Qarrunna hudete batinyinni kainohunni, hashsha ka'e dubbo hadhe rumudda corqitannoreeti.

⁴Maxine maxine yitannota dubbu daro xinqidhannoreeti; coommitannokkita ittanchu rumudda ittannoreeti.

⁵Mannu mooraano uu'isanni shorrannonte gede, insano mannu mereerinni shorrinannireeti.

⁶Galtannohuno boonoho, baalatenna, gaaru hunda noo godiraati.

⁷Dubbu giddo kawanna ka'a raataabbanni, moyichu gede woddannoreeti; haxanxaru hunda gamba yite heedhannoreeti.

⁸Gobbate aaninni ganne shorrinoonnihura, su'ma anfoonnikkire mulla manna ikkite heedhannoreeti.

⁹«Xa kayinni, oosonsa dagge, sirbunni maammaakke xontannae, insara godo'le ikkoommo.

¹⁰Ceeggifatte anewiinni ka'a shiqqi yitanno; saalfattukkinni aanaho anja tuffannoe.

¹¹Maganu wolqiweelo asse tuge agurroe daafira, alba'yaanni hasidhu gede ikkitanno.

¹²Losso ba'ino ooso doyissitinoe; sarraaqqe karte bala tuggaera qixxaabbino.

¹³Saeemmo doogo cuffe huntara hasidhanno; hatto assitannokki gede insa ittisannohu dino.

¹⁴Qiisho'ya diigge hunte, aanaho duunante gawajjitinoe.

¹⁵Lowo masilli amadinoe; ayirrinyi'ya diilallote gede ikke saino; qiniiti'ya guunjote gede ikke baino.

¹⁶«Qarru lowo geeshsha bati'rinoe daafira, xa reyote mule noommo.

¹⁷Hashsha hashsha bodi're miqicho daakkannoe; quruuxanno dhibbi faro diaannoe.

¹⁸Xisso imaana'ya rifachishshe, goowa qalxite amaddinoe.

¹⁹Maganu sabbaho tuge agureennae, dana danancho baoommo.

²⁰«Magano'ya, atewa hige raareenna, didawaroottoe; uurre ate huucci'reenna, dimacciishshoottoe.

²¹Addinta kaajjoottoe; wolqakki baalatenni sheteemmo gede assoottoe.

²²Diilallo adhite hadhannoe gede assoottoe; bubbe ka'anna kawa tuttuggannoe gede assoottoe.

²³Mannu baalu marannowa, reyote sayisse aattoeta afoommo.

²⁴Qarrame kaa'lote raarannoha, lede gawajjannohu nooni?

²⁵Ani shettinori ledo diwi'loommo? Gadadaammu daafira yee diyaadoommo?

²⁶Ani kayinni dancha coye agadhe hee'reenna, bushu coyi amadinoe; xawaabba agadhe hee'reenna barru tunsinoe.

²⁷Wodani'yanni lowo geeshsha yaadoommo; keere afi'rammora didandoommo; qarruno aani'yanni diha'rino.

²⁸Manninati'ya arrishshote iibbillinni ikkikkinni, dadillunni kolishshi'rino; gudumaaleho uurre, kaa'linaera huucci'reemmo.

²⁹Mannuwiinni baxxe, dubboho yeedaalatenna awulote ledo noommo.

³⁰Kolishshi'rinohu gogi'ya sholoolame ho'lino; bisi'ya fooggalunni giiramino.

³¹Hagiirre'ya leellishate ganeemmo gingilaatinna, ufuufeemmo suusulle, xa wi'lannita ikkitino.