Read Sidama_Qullaawa _Maxaafa IYYOOBI 37 Bible Online

IYYOOBI 37 - Sidama_Qullaawa _Maxaafa bible

IYYOOBI 37

¹«Kunnira, belequ wisho, wodana'ya masissinoe.

²Maganu huuro macciishshe! Afiisinni fulannoha belequ qaalesi macciishshe!

³Gordu giddoonni qole soyanno banqo, baattote qaccenni qaccete geeshsha leeltanno.

⁴Hakkunni gedensaanni, belequ gedeeta wolqaataame huurosi macciishshinanni; banqote bilicceessi marro marro hige leellanno.

⁵Maganu huuro dhaggete garinni beleqqanno; ninkeno wodancha dandiineemmokkiha lowo coye assanno.

⁶Kaade baattote aana dirritanno gede assanno; lowo xeenino dirranno gede hajajanno.

⁷Mannu baalu looso uurrisanno; isi assate dandaannore baala leellishannonsa.

⁸Hatte yannara moyichu baalu, dubbo e"e godaho maaxamanno.

⁹Jawaata bubbe wodiidinni ka'anno; qiidu bubbeno aliyyenni dagganno.

¹⁰Maganu foolisinni waa kaadete gedee kaajjado assanno.

¹¹Gomichu waa amadanno gede assanno; gomichu giddoonni qole banqo soyanno.

¹²Maganu gomichu doyanno gede assanno; hasi'riwa baala ha'ratenna yiino gede ikkate hajajamanno.

¹³Maganu xeena ganannohu, baatto shaqqisharaati. Qoleno manna qorichishara, woy baxillesi leellisharaati.

¹⁴«Iyyoobi, hanni suutunni ikkite wodanchi; Maganu loosannoha maalalete looso wodana assite hedi.

¹⁵Maganu gomicho hiitto asse hajajannoro, banqono hiitto asse beleqisannoro egennoottoni?

¹⁶Gomichu gordu aana hiitto ikke rarrainoro egennootto? Kuni dhaggete loosi, guuta egenno afi'rino Magani loosinoho.

¹⁷Wodiidi bubbe dagge baatto giirturo, ate iibbillu shetisannohe.

¹⁸Maganu gordo diriirsi waro, hincilaallote gede xawannoha assate kaa'loottosini?

¹⁹«Ninkera wodanu beewino daafira, mittoreno dianfoommo. Kunnira, Maganoho coyi'neemmore ati rosiisinke.

²⁰Maganu ledo hasaawa waajjeemmo; mayira kisi'reenna hunannoe?

²¹Bubbe gomicho huntuhu gedensaanni, arrishsho qase lae afannohu dino.

²²Aliyye ragaanni culka lawanno xawaabbi daanno; Maganuno dhaggete ayirrinyinni leellanno.

²³Maganu wolqa bayira ikkitinohura, mulisira shiqa didandiineemmo; isi baalunkurira keeraanchohonna halaalaanchoho.

²⁴Isi, ‹Ninke egennaammaho› yitannore naadannonsakki daafira, mannu baalu waajjannosi» yii.