Read Sidama_Qullaawa _Maxaafa IYYOOBI 38 Bible Online

IYYOOBI 38 - Sidama_Qullaawa _Maxaafa bible

IYYOOBI 38

¹Kaaliiqi hombobolattete giddo hee're Iyyoobira,

²«Afoottori nookkihu, ani assammora hedoommore xa'mate mayi wolqa noohe?

³Hanni mannu gede qodhite ka'e, xa'meemmohere qolate qixxaawi.

⁴«Ani kalqe kalaqummo waro, ati hakkiicho noottoni? Hanni hakkeeshshi egenno noohero, kulie.

⁵Baattote danna worinohu ayeti? Ise aana bikkinanni siiwo ganinohu ayetiro afootto?

⁶Baattote safo tuuqinohu maati? Kalqete dhaawate kincho kaasinohu ayeti?

⁷Hakko barra, soodimari beeddahe mitteenni faarsitino; Maganu sokkaasine ilillissino.

⁸«Baaru baattote godowa dare fuli yannara, wayi lolahannokki gede waalcho cufinohu ayeti?

⁹Baara gomichunni goloommohunna, tunsichunni xaaxoommohu ane di"ikkoommo?

¹⁰Baaraho danna qixxeesse, cufannanna waawanna woroommohuno aneeti.

¹¹‹Kawiinni sa'ooti! Jawaatu dambalikkino konne uurro!› yoommohu aneeti.

¹²«Iyyoobi, hee'ritto geeshsha, mitto barra nafa soodanno gede hajajje egennootto?

¹³Soodo xawaabbi baatto wo'manno gede, assite egennootto? Kunni xawaabbinni bushuullu maaxantinowa heedhe, huxidhanno gede assite egennootto?

¹⁴Barri xawaabbi, gaarranna lagga, erroonni imaaninna borreessinoonnihu doru uduunni gede asse leellishanno.

¹⁵Barri xawaabbi daannanni, bushuullu tunsichonsa hoogganno; mannano gawajjite diaffanno.

¹⁶«Baaru diime marte, buichosi laoottoni? Jawu baari hundira marte, ka'anna kawa ha'rante egennoottoni?

¹⁷Dhi'mote tunsichihanna, jeennaatu nafara, affe egennoottoni?

¹⁸Kalqe mageeshshi geeshsha lowotero afoottoni? Hanni konne baala afoottoha ikkiro kulie.

¹⁹Xawaabbu hiikkiinni fulannoro, tunsichu mama hee'rannoro egennoottoni?

²⁰Insano darginsara qolattora dandaattoni? Woy mininsara massitanno doogo kulte afattoni?

²¹Hatte yannara ilante noottona, dirikki lowohona, halaalinta ati afittokkinni digatatto!

²²«Kaadenna bullaame kaade duunoommowa, e'e egennoottoni?

²³Tenne kaade duunoommohu, bushu barri oliranna gaariraati.

²⁴Xawaabbu fulannowanna, soojjaati bubbe ka'anno dargira marte egennoottoni?

²⁵«Xeenaho dirranno faro qixxeessinosihu, beleqoho ha'ranno doogo seekkinohu ayeti?

²⁶Mannu hee'rannokkiwa moola darga, xeena gananno gede assannohu ayeti?

²⁷Moola dargano xeenu shaqqisheenna, hayisso daffitanno gede assannohu ayeti?

²⁸Xeenahonna lojaho annu ayeti?

²⁹Kaadetenna qorraho ama ayeti?

³⁰Wayi kinchu gede kaajjanno; baaru qorranna qeeqqa ikkanno.

³¹«Piliyaadisi yinanni beeddahe, hubbo hubbo assite wora dandaattoni? Ooriyooni yinanni beeddahe usura tira dandaattoni?

³²Beeddahe wogga woggantenni bobbaasa dandaattoni? Dibi yinanni beeddahe, oosonsanni ledo massaga dandaattoni?

³³Gordu galino woga egennoottoni? Tini woga baattote aana loossanno gede assa dandaattoni?

³⁴«Lolahu egemmannohe gede, xeena ganara gomicho hajaja dandaattoni?

³⁵Banqo beleqqanno gede hajajittoro, maahoyye yite hajajokki wonshitannoha lawannoheni?

³⁶Qo'laantete wayi lolahannota, lukkichoho xeena ganannota kulinohu ayeti?

³⁷Ogimmasinni gomicho kiirara dandaannohu ayeti? Gomichu waa galche xeena lolaasannohu ayeti?

³⁸Bullaame baatto xeena agge, gikki yitanno gede assannohu ayeti?

³⁹«Doobbiwoho ugaaxxe sagale aattonsaranna, hudidhinota oosonsa duushshattora dandaattoni?

⁴⁰Kuri baalunku dubbu giddo gadhe, maaxantannowa ri'e heedheenna, sagale aattonsara dandaattoni?

⁴¹Haraqeeyye hudidhe raataabbanna, caacurrinsa itannore hasi're, anewa hige raaranna, sagale aannonsahu ayeti?