Read Sidama_Qullaawa _Maxaafa IYYOOBI 4 Bible Online

IYYOOBI 4 - Sidama_Qullaawa _Maxaafa bible

IYYOOBI 4

¹Temaanichu Elfaasi qole,

²«Sammi yine la"a didandiinannina, mittu manchi ate ledo hasaawara hasi'riro koffi yaattoni?

³Hanni macciishshi, ati lowo manna rosiisootto; wolqiweeltinoreno jawaachishootto.

⁴Qaalikki ubbinore kayisino; ati shaqqitino wolqa jawaachishootto.

⁵Xa kayinni kuni coyi ate aana dayenna, cinca hoogootto; kuni coyi iilleennahe hexxo ba'inohe.

⁶Magano ayirrisakki hawaqi'rate, sumbekkino hexxote di"ikkitannohe?

⁷Hanni qaagi ballo; keeraanchu manchi bae egenninoni? Sao assikkinni bainohu ayeti?

⁸Ani afummo geeshsha, bunshe wixidhannori callu, qarra mixxitanno.

⁹Maganu foolinni ba'anno; hanqisi bubbenni gooffanno.

¹⁰Cubbaataammu doobbiwu gede ittantanno; Maganu kayinni gabbi assannonsa; hinkonsano cancananno.

¹¹Jajjabbu doobbiwi gede hudidhe reyitanno; oosonsano billaallitanno.

¹²«Mitte hige haaqeete, hashaanshoonni sokka macciishshoommo.

¹³Tini hashsha haaqii'roommo haaqee, lowo goxano amaddino manchi gede assite jawaawurrissinoe.

¹⁴Hatte yannara, mase huxi'roommo; mannimma'ya baala waajjillunni kainohunni qece yitu.

¹⁵Ayyaanu alba'yaanni hige sai; mannimma'ya baalano qiiddu.

¹⁶Hakkiicho mitturichi uurre no; danasi kayinni bade afammora didandoommo; ca'lamaddi yiino darginni, mitte huuro macciishshoommo.

¹⁷Tini huurono, ‹Mannu Maganu albaanni keeraancho ikkara, woy kalaqaanchisi albaanni keeraa'mara dandaannoni?

¹⁸Maganu soqqamaanosi diaddaxxanno; sokkaasinesi giddono so'ro dihooganno.

¹⁹Hatto ikkiro, konne cuuncichu gede mircaannoha, bushshunni kalanqoonniha, hiitto asse addaxxannoyya?

²⁰Soodonna hawarro mereero cancanamanno; ayino hedikkinni hegerera ba"anno.

²¹Dukkanuno diigamanno; Maganu egennono afikkinni reyanno› yitanno.