Read Sidama_Qullaawa _Maxaafa IYYOOBI 6 Bible Online

IYYOOBI 6 - Sidama_Qullaawa _Maxaafa bible

IYYOOBI 6

¹Iyyoobi daware,

²«Dadille'ya keennoonniha ikkoommero, qarra'ya baalanka keenaasinchu aana worroommero,

³baaru shaafinni roore bati'ranno; qasanno coye coyi'reemmohu kunniraati.

⁴Wo'manka Dandaanno Magani maxxi, ane mannimma giddo no; giddo'yara harfu eino. Maganu waajjishanno bagado alba qolinoe.

⁵Halaalinta gobba harrichi hayisso afi're hee're, handuno itannori albasiinni hee'reenna wodannoni?

⁶Maxine nookkita coommitannokki sagale intannini? Quuphichu wayi coommannoni?

⁷Hattoo sagale kokke gibbinoe; tenne sagale iteemmo woyite dhiwameemmo.

⁸«Maganu huuccatto'ya macciishsha mayira giwie? Yoroommoreno mayira ho'lie?

⁹Ane haa're hooloomme"erolla woyyate; shee hunoomme"erolla woyyate.

¹⁰Shaannoeta afoommoro, dhibbi'ya bati'riro nafa, Qullaawu Magani yiinore giwa hooga'yanni, hagiidhanni hee'reemmohu baino.

¹¹Hexxo nooekkiha ikkiro ma"assi'rammora hee'reemmo? Cincammora gawalo'ya afoommoni?

¹²Ani kinchu gedee kaajjadootini? Manninati'ya camote siwiilaatini?

¹³Umo'ya gatisi'reemmo wolqa dinoe; kaa'lo afi'rate ha'reemmowino dinoe.

¹⁴«Ane marara hoogginiero, Wo'manka Dandaannoha Magano diwaajjitinoonni yaate.

¹⁵Ki'ne jaalla'ya, xeenu hooganno woyite moolanno xashshi gede dogginannie.

¹⁶Kaadenna bullaame kaade wo'mitinosi daafira, lolahanno wayi lowo geeshsha waajjishanno.

¹⁷Iibbillu yannara moolanno; darguno mulla ikke gatanno.

¹⁸Hogowi saada noonsari, waa hasidhanni hadhe, halallitte gobbara reyite gooffanno.

¹⁹Teema daddalaasine konne waa la'anno; Saaba daddalaasineno iso hexxitanno.

²⁰Waa afi'neemmo yite hakkiira martanno; afi'ra hooggino daafira, saalfatte gara habbanno.

²¹Ki'neno hakkonne waa labbinoonnie; qarra'ya la'ine waajjitine badhera higginanni.

²²Halaalinta gubbo abbe"e; woy jiro'ne giddonni afansha uuyye"e;

²³woy woxi'nenni diini'ya anganni gatisse"e; woy shetisannoehu anganni wodde"e yuummo'neni?

²⁴«Ani sammi yeemmona, hanni rosiisse"e; so'roommoreno kulle"e.

²⁵Suwashshu qaali hiittoo wolqaataamooti! Ki'ne yekkeerama kayinni maricho leddanno?

²⁶Hexxo noosikki manchi coyi diilallote gedeetina, hiitto assitine garaho qoltinannieha lawanno'ne?

²⁷Buxo soqqamaano'ne assidhinara hixa tuqqitinanni; jaali'nerano bale untinanni.

²⁸Xaano eeggatena, anewa higgine la'e; alba'neenni dhara dicoyi'reemmo.

²⁹Eegga'neetina, beebbatenni bushiishshinoonte"e; busha assummokkinni su'ma huntinoonte"e.

³⁰Halaalinta arrawi'yara sao affinoonnini? Halaalenna kapho bade afeemmoha dilawanno'ne?