Read Sidama_Qullaawa _Maxaafa IYYOOBI 7 Bible Online

IYYOOBI 7 - Sidama_Qullaawa _Maxaafa bible

IYYOOBI 7

¹«Baattote aana mannu heeshsho daafurunnita di"ikkitino? Hee'nanni barri qaxarame loosanno manchihu gedeeha di"ikkino?

²Borojjichu caale hasi'rannonte gede, kiranyuno baantannisire agadhannonte gede,

³hattonni noori nookkiha mulla haafa aganunni agana, qarru giddo hee're, hashshunni hashsha saoommo.

⁴Goxeemmo yannara, ‹Mamoote kaeemmo?› yeemmo. Hashshu rahe disoodannoe; sooda geeshsha ma'na'yara ka'anna kawa higanni galeemmo.

⁵Bisi'ya, da'muullanna buko uddi'rino; mada'ya giddonni malaa lolakkanno.

⁶Barri'ya hexxo nookkiha goofanno; uddano gannanni mooqqonni roore muddame qacce fulanno.

⁷«Magano, heeshsho'ya fooleessu gedeeta ikkitinota qaagi; kunni ka'a ille'ya dancha coye dila'anno.

⁸Xa la"annoehu ille kunni ka'a dila'annoe; ane hasattoeta ikkinnina, diafattoe.

⁹Billaalle ba"anno gomichi gede, jeennaate dirrannohu galagale difulanno.

¹⁰Minisira galagale dihiganno; egenninosihu baalu hawannosi.

¹¹Kunni daafira, sammi diyeemmo; ayyaani'ya shettonni coyi'reemmo; lubbo'ya dadillinni qurteemmo.

¹²Ani baarahoni? Woy baaru moyichootini? Mayira agaraancho worittoe?

¹³Ani, ‹Goxe fooliishshi'reemmo; dhibbi'yarano woyyimma afi'reemmo› yee hexxeemmo.

¹⁴Ati kayinni, haaqeete waajjishiishattoe; ajuujatenni masisattoe.

¹⁵Tenne qarraataame heeshsho hee'rammontenni, qalxine shinannieta doodhoommo.

¹⁶Heeshsho'ya mishoommo; hee'rammora horontanni dihasi'reemmo; heeshsho'ya ditidhitinotena, agurie.

¹⁷«Ayirrisattosira mannu isi maati? Mannu assannore ille tugge mayira la"atto?

¹⁸Soodo soodontenni towatattosi; wo'manka woyite jiffe la"attosi.

¹⁹Anja egemmammo geeshshano ikka, mayira shawwu yite diagarattoe?

²⁰Manna agaratto Magano! Ani cubbo loosummoro atera ma hunummohe? Togoonta mayira illaallisattoe? Illekkino ane aana mayira woratto? Ani hakkeeshshi geeshsha atera duha ikkoommoheni?

²¹Sao'ya mayira agura giwittoe? Cubbo'yano haadhe mayira dihoolattoe? Rahe baattote giddora e"eemmo; hasseno diafattoe» yii.