Read Sidama_Qullaawa _Maxaafa FAARSO 104 Bible Online

FAARSO 104 - Sidama_Qullaawa _Maxaafa bible

FAARSO 104

¹Lubbo'ya, Kaaliiqa galatisi! Kaaliiqa Magano'ya, ati mageeshshi geeshsha lowoho! Gaacheenanna ayirrinye uddi'rootto.

²Xawaabba imaanimma tuulatootto; gordo dukkanu gede diriirsootto.

³Minekki wayibbate aleenni mi'nootto; gomicho faradi gaarekki assi'rootto; bubbete qoolinni ha'ratto.

⁴Bubbe sokkaanokkiiti; giirate buwanino soqqamaanokkiiti.

⁵Baatto xintise aana kaajjishshe uurrisootto daafira, horontanni dishashshafantanno.

⁶Lowo baara uddanimma uddisiisoottose; wayino ilaalla guggushshino.

⁷Wayi rufittosi woyite albikkinni rahe xooqi; beleqikki luulo macciishshi yannara rahe ha'ri.

⁸Wayi qixxeessoottosi dargira, ilaallate aaniranna laggate giddora hige lolahi.

⁹Galagale baatto amadannokki gede, wayi dhoose sa"annokki danna worootto.

¹⁰Bu'a laggate giddo du'nantanno gede, hadhanno wayibba ilaallate mereeroonni higge lolakkanno gede assootto.

¹¹Kunni garinni dubbu moyichi aganno waa afi'ranno; gobba harreno agge goo'ro fultanno.

¹²Tenne hadhanno wayibbanna bu'ate mule, noo haqqe aana cea mine mi'nite faarsitanno.

¹³Xeena gordunni ilaallate aanaanni qolte dirrisatto; baattoteno aattose atooti wo'manno.

¹⁴Baatto mu'ro fushshitanno gede assatto; saadate hayisso fushshatto; mannuno loosi're sagale afi'ranno.

¹⁵Hagiirsiissannota woyinete xajje, alba mucci assitanno zayitenna, wolqa uyitanno sagale qixxeessatto.

¹⁶Kaaliiqi kaasinohu, Libaanoosi daguwi, ikkanno geeshshi xeena afi'ranno.

¹⁷Aanansa cea mine mi'nitanno; bajjuwano daguwu aana galtannowa seekkidhanno.

¹⁸Geedimu jajjabba ilaalla aana hee'ranno; weceeceno kinnate qarrira maaxantanno.

¹⁹Wogga bade afate agana kalaqootto; arrishshono yannasera e'anno.

²⁰Hashshano ati kalaqootto; hakko tunsichinni dubbu moyichi baalu fulanno.

²¹Doobbiichu qallo Maganu qixxeessinonsa sagale, hasidhara hadhanno woyite ittantanno.

²²Arrishsho fultanno woyite, galagalte higge citinsa giddo gadhanno.

²³Hakkunni gedensaanni mannu loosoho fulanno; hawarra geeshsha loosi'ranni hosanno.

²⁴Kaaliiqa, ati lowore kalaqootto; baalanka ogimmakkinni seekkootto; baattote ati kalaqoottori wo'mino.

²⁵Jawunna hala'ladu baari no; giddosi jajjabbunna manaaddu kiiro anfoonnikki kalaqami hee'ranno.

²⁶Aanasiinni markaawe hadhanno; giddosino ati kalaqoottohu Lewaataani yinannihu baaru moyichi godo'lanno.

²⁷Kuri baalunku hasiisannonsa woyite sagale aattonsa gede, hexxitannohehu ateeti.

²⁸Sagale ati uyiteennansa ittanno; ati angakki hiixatattonsa; insano danchare baala itte duubbanno.

²⁹Ati insawiinni baxxatto woyite massanno; foolensa haa'ratto woyite reyitanno; fultino bushshi giddora galagalte higganno.

³⁰Foole worattonsa woyite kayinni, heeshshonnire ikkitanno; baattote aana noore baala haaro assatto.

³¹Kaaliiqi ayirrinyi hegerera hee'ro! Kalaqi'rinori baalunkunni tashshi yoosi!

³²Isi baatto la"anno; iseno huxidhanno; ilaalla kisanno; insano wiliiltanno.

³³Lubbotenni noommo geeshsha Kaaliiqira faarseemmo; hee'reemmo diri baalunkunni Magani'yara galatu faarso shiqishi'reemmo.

³⁴Hagiirre isiwiinni afi'reemmo daafira, shiqishi'reemmosi faarsonni tashshi yoosi.

³⁵Cubbaataammu baattote aaninni ba'o; beebba assitannori horontanni heedhoonke. Lubbo'ya, Kaaliiqa galati! Kaaliiqi galatamo!