Read Sidama_Qullaawa _Maxaafa FAARSO 105 Bible Online

FAARSO 105 - Sidama_Qullaawa _Maxaafa bible

FAARSO 105

¹Kaaliiqa galattesi; su'masino guwisse; assinore baala gosate hasaabbe.

²Kaaliiqira galatu faarso faarse; assino dhagge baala kulle.

³Qullaawu su'misinni naaxxe; iso magansidhannorira baalaho tashshi yoonsa.

⁴Kaa'losi afidhinanni gede Kaaliiqa hasidhe; wo'manka woyite magansidhesi.

⁵Ki'ne soqqamaanchisi Abirihaami ooso, doorantinoonniri Yaiqoobi sirchi baalu, Kaaliiqi assino maalale baalanna, yiino yoo wodanche.

⁷Kaaliiqi Maganonkeeti; isi baatto baalate halaale coy'ranno.

⁸Gondoorosi hegerera, uyino hexxono kume ilama geeshsha agaranno.

⁹Abirihaami ledo eino gondooronna, Yisihaaqira xaarino xaaro agaranno.

¹⁰Konne coye Yaiqoobira wodho, Israeelete gondooro asse worino.

¹¹Qoleno, «Kana"aani baatto eemmohe; atera iqqakki ikkitanno» yiino.

¹²Maganu manni kiiro aje noo waro, Kana"aani gobbara wosinimma hee'rino.

¹³Gobbatenni gobba sa'ino; gashshootunni gashshoote sa'anni raataabbino.

¹⁴Maganu kayinni ayino gadadisansara wore dilaino; insa agarara yee mootoolla,

¹⁵«Doorantinore soqqamaano'ya gawajjitinoonte; himanaano'yano kissinoonte» yee qorophisiisino.

¹⁶Kaaliiqi Kana"aani gobbara hude abbi; sagalensa baala huni.

¹⁷Kayinnilla, insa giddonni mitto mancho balaxe soyi; isino borojjimmate hiraminohu Yooseefiiti.

¹⁸Lekkasi cagaagetenni usurantino; goowisirano siwiilu shibo worroonni.

¹⁹Coyi'rinori wo'ma geeshsha, Kaaliiqi qaalisinni jife lainosi.

²⁰Gibitsete moote tidhamanno gede assisi; dagate gashshaanchi tirsiisisi.

²¹Gashshootisira roorricha assisi; baatto baala gashshanno roorre uyisi.

²²Isino mootete amaalaasinera mala aate roorricha ikki; mootete amaalaasine aanano roorre afi'ri.

²³Hakkunni gedensaanni, Yaiqoobi Gibitsete gobba ha'ri; hakkiichono xalatimmatenni hee'ri.

²⁴Kaaliiqi mannasi batisinsa; diinnansanni roore jawaatoota assinsa.

²⁵Mannasi giwanno gedenna, soqqamaanosi xagaranno gede, Gibitsete manni wodana kaajjado assi.

²⁶Hakkunni gedensaanni, soqqamaanchosi Musenna, doodhinoha Aarooni soyi.

²⁷Insa Gibitsootu mereero maalale assitu; hatte gobbara dhagge loossu.

²⁸Maganu hattenne gobba tunsichu amadanno gede assi; ikkollana Gibitsootu hajajosi diayirrissino.

²⁹Hadhannota wayibbansano mundeete soorri; qulxu'mensa baala shee gudi.

³⁰Gobbansa baalate beche'naama wo'mitu; mootete mini nafa gatikkinni amadami.

³¹Gobbansa baalate teennunna biinne wo'mitanno gede hajaji.

³²Xeenu darga kaadenna, gobbansa baalate giirate gede bubbanno banqo soyi.

³³Intannita laaltanno haqqe gudi; wole haqqe baalano hiiqqaqqi.

³⁴Isi hajajita kanchafarunna, kiiro afi'rinokkihu kukkubbanno kanchafari dayi.

³⁵Baattote aana nooha shaqqado haqqanna, gide baala ite gudi.

³⁶Mittu mittunku Gibitsichiha bayira beetto shii.

³⁷Hakkunni gedensaanni, Israeele haa're fushshinsa; insa fultu yannara culkanna birra adhite fultino; giddonsanni mittuno badhera hige gatinohu dino.

³⁸Gibitsootu lowo geeshsha waajjitinonsa daafira, fulansara hagiidhitu.

³⁹Gomicho dukkote gede asse golinsa; hashshirano xawaabba uyitanno giira qixxeessinsa.

⁴⁰Xa'midhu yannara hanshaqqe soyinsa; gordunni sagale soye duushshinsa.

⁴¹Kincho dhooseenna wayi fulinsa; halallitte gobbara wayi xashshimma lolahinsa.

⁴²Soqqamaanchisi Abirihaamira uyinoha, qullaawa gondooro qaagi.

⁴³Dooraminoha mannasino haa're fushshi; insano hagiidhitanni faarsitu; ilillissu.

⁴⁴Wole daga baatto uyinsa; wolootu daafurte loosidhino jajja ragisiisinsa.

⁴⁵Konne duucha assinohu, mannisi seerasi agadhanno gedenna, hajajosi wonshanno gedeeti. Kaaliiqira galatu iillosi!