Read Sidama_Qullaawa _Maxaafa FAARSO 109 Bible Online

FAARSO 109 - Sidama_Qullaawa _Maxaafa bible

FAARSO 109

¹FAARSAANOTE ROORRICHIRA DAAWITI FAARSO Magano'ya! Galaxxeemmohe; macciishshite sammi yitootie.

²Xagaraano kaphu callunni gawajjitinoe; beebbatenni su'ma'yano huntino.

³Mulla ka'e qarrissannoe; ane aana bunshe coyidhanno.

⁴Ani baxaa hee'reennansanni, insa daafira huuccanni hee'reennanni gibbue.

⁵Danchummate darga bunshe assitue; baxeemmonsa darga gibbue.

⁶Baarigaari'yara yoo shokkishannoha kayisi; baarigaaru gereerannosi gede assi.

⁷Yekkeeramirono garame higanno gede assi; huuccattosi nafa cubboho kiiranto.

⁸Barrimale reyo; loososino wolu adho.

⁹Oososi anniweeloota ikkito; ayiddaamasino gunnitte ikkito.

¹⁰Oososi minu nookkire huucci'raano ikkito; xa noo oninni nafa shorranto.

¹¹Jajjisi baalu aseleho amadamo; assi'rinoha baala allaggu adhito.

¹²Mararannosi manni horonta hee'roonke; buxosi towatannohu hee'roonke.

¹³Ilasi ikkinohu mittu nafa hee'roonkesi; mitte ilama gedensaanni qaagannosihu hee'roonke;

¹⁴Kaaliiqi annuwasi assitino cubbo qaagosi; amasi cubbo nafa hawoonkesi.

¹⁵Kaaliiqi cubbonsa hawoonke; insa horonta hawantinore ikkito.

¹⁶Kuni manchi dancha coye assara horontanni dihasi'rino; buxane, qarraataammanna gadadaamma hase shiino.

¹⁷Rumo baxannoha ikkino daafira, iso maassi'rannosihu hee'roonke. Maassi'ra giwannoha ikkino daafira, isino rumaminoha ikko.

¹⁸Isi rumo imaanimma uddi'ro; umisi rumo baala manninatesi wayimma shanshito; buuru gede daadde miqichoho e'osi.

¹⁹Uddanote gede dibbosi; hiitote gede halloho xaaxantosi.

²⁰Kaaliiqa'ya ballo, ane aana bunshe coyidhannore, baarigaarra'ya kunni garinni qorichishi.

²¹Mooticha Kaaliiqa'ya, ane kayinni su'mikkira yite kaa'lie; ati shaqqadohona, bagamannokkihu baxillikkinni gatisie.

²²Ani buxichohonna gadadaamoho; iillinoe qarrino wodana madiissinoe.

²³Hawarro caali gede ikke sa"ate gambisoommo; kanchafaru gede assite bubbe haadhe hadhue.

²⁴Qatumetenni kainohunni mikita shaqqitue; maali'ya miqichoho fuli.

²⁵Mannu lae oso'lie; angichunni kulanni qacifatie.

²⁶Kaaliiqa Magano'ya ballo, kaa'lie; bagamannokkihu baxillikkira yite gatisie.

²⁷Gatisattoehu ate calla ikkoottota, diinna'ya affanno gede assi.

²⁸Insa runtuerono, ati kayinni maassi'rattoe; yuutteessitannoere shollishinsa; ane soqqamaanchokkino hagiirsiisie.

²⁹Diinna'ya shollinye imaanimma uddidho; saalano aanaho ga'nito.

³⁰Isi buxichoho qiniitichosiiti; shitasira maltinori anganni gatisannosi. Kunnira, qoonqo'ya naggi asse Kaaliiqa galaxxeemmo; songote mereero ayirriseemmosi.