Read Sidama_Qullaawa _Maxaafa FAARSO 135 Bible Online

FAARSO 135 - Sidama_Qullaawa _Maxaafa bible

FAARSO 135

¹Kaaliiqa galatte! Ki'ne Kaaliiqi soqqamaano su'masi galatte;

²Maganinke Kaaliiqihura Qullaawu Mini giddo uurritinanniri baalu galattesi.

³Shaqqado ikkino daafira Kaaliiqa galattesi; dancha ikkino daafira su'misira galatu faarso shiqishshe.

⁴Kaaliiqi Yaiqoobi umisiha, Israeelete mannano umisi jiro asse dhoodhino.

⁵Kaaliiqi maganna baalanta roorannoha, jawa Magano ikkinota afoommo.

⁶Gordohonna baattote aana, baaru diime giddo hasi'rinore assanno.

⁷Xeena amadino gomicho baattote qaccenni abbanno; xeenu yannara banqo dirritanno gede assanno; bubbeno noo darginni fushshe soyanno.

⁸Gibitsete gobbara, umita mannu ilanna saadate qallo shiino.

⁹Hakkono Feriooninna soqqamaanosi qorichishara, maalalenna dhagge assino.

¹⁰Lowo daga gashshoote diigino; wolqaataamma mootoollano shiino.

¹¹Amoorawootu moote Sewooni, Baasaani moote Aaginna Kana"aani mootoolla baala shee gudino.

¹²Baattonsano mannisira Israeelete ragisiisino.

¹³Kaaliiqa, su'mikki wo'manka woyite duduwamanni hee'ranno; ilama baala qaaggannohe.

¹⁴Kaaliiqi mannisira halaale coyi'ranno; soqqamaanosino mararannonsa.

¹⁵Dagate maganna, mannu birrunninna culkunni seekkinote.

¹⁶Afuu noonsana, kayinni dicoyidhanno; ille noonsana, kayinni dila'anno.

¹⁷Macca noonsana, kayinni dimacciishshitanno; foola nafa didandiitanno.

¹⁸Seekkidhunsarinna addaxxitunsari baalu, tenne misilla gedeere ikkito.

¹⁹Israeelete manna, Kaaliiqa galatte; ki'ne Kaaliiqi qeesooti, Kaaliiqa galatte.

²⁰Ki'ne Leewaawootu Kaaliiqa galatte; Kaaliiqa ayirrissinanniri baalu, galattesi.

²¹Kaaliiqa Tsiyooni galattesi; teessosira Yerusaalamete galattesi. Kaaliiqa galattesi!