Read Sidama_Qullaawa _Maxaafa FAARSO 140 Bible Online

FAARSO 140 - Sidama_Qullaawa _Maxaafa bible

FAARSO 140

¹FAARSAANOTE ROORRICHIRA DAAWITI FAARSO Kaaliiqa'ya ballo, bushu manniwiinni gatisie; marartannokkiri anganni agarie.

²Insa wo'manka woyite busha gano gantanno; wo'manka woyite gibbo hassanno.

³Arrawinsa hamashshu gede iddannoho; qaalinsano buutete harfi gedeeho.

⁴Kaaliiqa'ya ballo, bushuullu wolqawiinni agarie; marartukkinni tuggaera gano gantannori anganni gatisie.

⁵Boonaleeyye woshshaado wortinoe; anera siiwo gantinoe; amaddaera doogote aana woshshaado wortinoe.

⁶Kaaliiqa, «Ati Magano'yaati» yeemmosi; Kaaliiqa'ya ballo, kaa'lokki afi'rate raareemmo woyite macciishshie.

⁷Jawaata gargaraasincho'ya ikkoottohu Mooticha Magano'ya! Olu barra ati siwiilu gullee'yaati.

⁸Kaaliiqa ballo, haxawarrootu hasidhannore uyitootinsa; ganonsano darga gantanno gede assitooti.

⁹Diini'ya qeelannoe gede assitootie; anera heddanno bunshe uminsara higgo!

¹⁰Giirate kashili aanansa uwo; balete giddo tuganto; hakkiinnino horonta fultoonke.

¹¹Woloota beebbatenni gereertannorira qinoonkensa; mararro nookkire bushu coyi daneessonsa.

¹²Kaaliiqa, ati buxanete halaale coyi'rattota, qarraataammahono dancha malattota afoommo.

¹³Keeraano addintanni galattannohe; ate albaanni hegerera heedhanno.