Read Sidama_Qullaawa _Maxaafa FAARSO 143 Bible Online

FAARSO 143 - Sidama_Qullaawa _Maxaafa bible

FAARSO 143

¹DAAWITI FAARSO Kaaliiqa'ya ballo, huuccatto'ya macciishshie; halaalaanchimmakkinni huuccatto'ya macciishshi; ammanamakkinni huuccatto'yara dawaro qolie.

²Mittuno keeraanchu nookkita ati afoottona, ane soqqamaanchokki yoote shiqishshootie.

³Baarigaari'ya hasanni hoode daye qeele angara qo'linoe; tunsichu giddono usurinoe; bi're bi're reyino manni gedeeha ikkoommo.

⁴Kunninni kainohunni hexxo mudhate gamba yee, lowo geeshsha shetoommo.

⁵Sa'u barruwa qaageemmo; ati assootto coyi baalu qulli yaannoe; assoottore baala marro hige hedeemmo.

⁶Anga'ya huuccattote ate widira qole fa'neemmo; moola baattora wayi hasiisannonte gede, lubbo'yano ate hasidhanno.

⁷Kaaliiqa'ya ballo, hexxo'ya baala ba'inona, keeshshittokkinni macciishshie; alba go'littoero, jeennaate dirritinori ledo karsama'yaati.

⁸Addaxxeemmohu ate ikkootto daafira, soodo soodontenni bagamannokkiha baxillekki afeemmo gede assie; huuccatto'ya atewa shiqishi'reemmo daafira ha'reemmo doogo leellishie.

⁹Kaaliiqa'ya agarattoe gede atewa dayemmona, diinna'yawiinni gatisie.

¹⁰Ati Magano'yaati; hedoottore asseemmo gede kaa'lie; shaqqadu ayyaanikki xalala doogo qole haa're haroe.

¹¹Kaaliiqa'ya ballo, oottoe hexxo garinni heeshsho'ya agarie; shaqqillikkinni mitiimma'ya baalate giddonni fushshie.

¹²Bagamannokkiha baxillekki xawisse, diinna'yano shii; ani soqqamaanchokki ikkoommohura, gadadissannoere baala gudi.