Read Sidama_Qullaawa _Maxaafa FAARSO 144 Bible Online

FAARSO 144 - Sidama_Qullaawa _Maxaafa bible

FAARSO 144

¹DAAWITI FAARSO Hale'ya ikkinohu Kaaliiqi galatamo! Gaaroho qajeelchannoe; olahono qixxeessannoe.

²Kaaliiqi hale'yaatinna golo'yaati; mine'yaatinna gatisaancho'yaati; iso addaxxe keere hee'reemmo; isi gosa baala anera gashshantannoe gede assanno.

³Kaaliiqa'ya, kageeshshi geeshsha mitii'mattosihu isi mannu maati? Kageeshshi geeshsha qarramattosihu isi mannu maati?

⁴Mannu fooleessu gedeeho; dirisino caalu gede ikke sa"annoho.

⁵Kaaliiqa, gordo darte dirri; wiliiltanno gede, ilaalla kisi.

⁶Banqote beleqo sokke, baarigaarrakki billaallisi; insa, maxxakki olte shorri.

⁷Angakki diriirsite, diimete wayi giddonni, goshooshshe fushshite gatisie; allaggu anganni fushshie.

⁸Insa horontanni halaale dicoyidhanno; xaartanni nafa kaphitanno.

⁹Magano'ya, haaro faarso faarseemmohe; bagana gananni faarseemmohe.

¹⁰Ati mootoollate qeelle haraqi'risiisatto; soqqamaanchokki Daawiti gatisattosi.

¹¹Kaajjaddu bagadiwiinni gatisie; allaggu anganni fushshie; insa horonta halaale dicoyidhanno; xaartanni nafa kaphitanno.

¹²Oosonke anje heedhenni, haaru kaashshi gede lophite kaajjito; seenninkeno mootete mine biifisate, xarrate qaccera uurrinsoonnire, suwadda tuuqqa gedeere ikko.

¹³Gootarranke baalate addi addi gidi wo'mo; qanchuwankera hosanno ge'reewi, kumunni kiirranni wilii'le qalo.

¹⁴Saadanke baala fushshite huntukkinni qalante batidho; dooggankera dadillenna raare, horontanni macciishshinoonke.

¹⁵Kunni gari manni ba'raa'rinoho; Kaaliiqi Maganonsa ikkino manni ba'raa'rinoho.