Read Sidama_Qullaawa _Maxaafa FAARSO 145 Bible Online

FAARSO 145 - Sidama_Qullaawa _Maxaafa bible

FAARSO 145

¹DAAWITITA GALATU FAARSO Magano'yanna moote'ya, lowimmakki duduweemmo; hegerera galateemmohe.

²Barru barrunkunni galateemmohe; hegere hegerera galateemmohe.

³Kaaliiqi lowoho; lowo galati hasiisannosiho; lowimmasino mannu hedora aleenniiti.

⁴Jajjabbu loosikki ilamate ilama geeshsha galantanna hee'ranno; gosano dhaggenniha loosokki dudubbanno.

⁵Ayirrinyikkinna xirchikki gaamaarre hasaabbanno; anino dhaggenniha loosokki marro hige qaageemmo.

⁶Mannikkino, jajjabbu loosikkire hasaawanno; anino lowimmakki kuleemmo.

⁷Shaqqillikki batinye hasaabbanno; halaalaanchimmakkireno faarsitanno.

⁸Kaaliiqi mararaanchohonna shaqqadoho; hanqoho dimuddamanno; bagamannokkihu baxillisino hegereho.

⁹Isi mannu baalunkura shaqqadoho; kalaqama baala mararanno.

¹⁰Kaaliiqa, kalaqoottohu baalu galatannohe; mannikki baalu guwisannohe.

¹¹Mootimmakki gaacheenire hasaabbanno; wolqakkireno coyidhanno.

¹²Mannu baalu kunni garinni, wolqakkinni loosoottoha jajjabba loosonna, jawa gashshootikki gaacheena afanno.

¹³Gashshootikki hegereho; ati ilamate ilamara mootete. Kaaliiqi gondoorisira ammanaminoho; isi kalaqinore baala mararanno.

¹⁴Qarru giddo noore kaa'lannonsa; ubbinoreno kayisannonsa.

¹⁵Lubbo afi'rino kalaqami baalu hexxotenni ate la"anno; atino hasiisannonsa yannara sagale aattonsa.

¹⁶Ikkannonsa geeshshire aattonsa; wo'munku halcho wonshatto.

¹⁷Kaaliiqi assanno coyi baalunku halaalaanchoho; baalanka coye shaqqillunni assanno.

¹⁸Kaaliiqi woshshidhannosirira, woy taxidhe woshshidhannorira baalaho mule no.

¹⁹Ayirrissannosirira hasiisannonsare baala aannonsa; raarensa macciishshe gatisannonsa.

²⁰Baxxannosire baala agarannonsa; bushuulle kayinni hunanno.

²¹Ani wo'manka woyite Kaaliiqa galaxxeemmo; kalaqinonsari baalu qullaawa su'masi hegerera guwisso!