Read Sidama_Qullaawa _Maxaafa FAARSO 18 Bible Online

FAARSO 18 - Sidama_Qullaawa _Maxaafa bible

FAARSO 18

¹KAALIIQI SAAOOLINNA DIINNASI BAALATE ANGANNI GATISISI WARO FAARSAANOTE ROORRICHITA DAAWITI FAARSO Kaaliiqa, ati wolqa'yaatina baxeemmohe.

²Kaaliiqi golo'yaati; qiisho'yaatinna gatisaancho'yaati; Magani'ya maaxameemmo godaati; wonqo ikke gargarannoe; ha'leno gatisannoe; isi anera seeda shaeeti.

³Galatu hasiisannosiha Kaaliiqa woshshi'reemmo; isino baarigaarra'yawiinni gatisannoe.

⁴Reyote game amaddue; baote lolahino egemmie;

⁵Jeennaatu siiwo xaaxantue; reyote woshshaadono amaddue.

⁶Shetummo yannara, Kaaliiqa woshshi'rummo; kaa'laera Magani'yawa hige raarummo; Qullaawu Minisira hee're, qoonqo'ya macciishshi; raare'yano isiwa iillitu.

⁷Maganu hanqino daafira, baatto huxidhu; shafantu; ilaallate hundino milli yii.

⁸Sanosinni wiliile fultu; afiisinnino ittanno giiranna buwanno kashili fuli.

⁹Gordo dare dirri; kolishshu gomichi lekkasira woroonni no.

¹⁰Kirubeeli[1] aana ofolle ha'ri; bubbete qooli aana ofolle buuwi.

¹¹Isonoo kolishshu gomichinni goli; xeena amadinohu du'mu gomichi gaangeessinosi.

¹²Albasiinni noo beleqinni, kaadenna giirate buwani fule, du'mu gomichi giddoonni hige sai.

¹³Kaaliiqino gordoho hee're beleqi; Wo'munkura Aliidi Magani huurosi macciishshiishi.

¹⁴Maxxasi ole baarigaarrasi billaallisi; belequ bilicceessinni waajjishiishinsa.

¹⁵Kaaliiqa, baarigaarrakki rufittonna, hanqunni beleqitto yannara, baaru faashshi yeenna baatto reqecci yitu.

¹⁶Kaaliiqi iiminni angasi diriirse haarie; wayi diime giddonni fushshie.

¹⁷Lowo geeshsha wolqissinoe baarigaarranna, gibbannoeri baalunkuwiinni gatisie.

¹⁸Qarramummo barra aana'ya ka'ue; Kaaliiqi kayinni irko'ya ikkinoe.

¹⁹Baxinoe daafira, qarru giddonni fushshe, faffote darga masse worinoe.

²⁰Kaaliiqi halaalaanchimma'ya garinni uyinoe; wodani'ya keeraanchimma garinni maassi'rinoe.

²¹Kaaliiqi seerano agadhoommo; bunshe loosate yee, Magani'yara badhe diwodhoommo.

²²Hajajosi baala alba'yaanni no; seerisiwiinnino difafoommo.

²³Isi albaanni sao diassoommo; cubbono qorophoommo.

²⁴Kaaliiqino halaalaanchimma'ya garinninna, wodani'ya keeraanchimma garinni daware aannoe.

²⁵Kaaliiqa, ati ammanamino manchira, ammanamoottohu. taashshanno manchira ati taashshattoho.

²⁶Suwashshu manchira suwashshoho; shokkashshu manchira kayinni gara giwattosi.

²⁷Umonsa heeshshi assitinore gatisatto; boonaaleeyye heeshshi assatto.

²⁸Ati caabbicho'ya xawisattoena; ati Kaaliiqi Magani'ya tunsicho'ya haadhe hoolatto.

²⁹Ate wolqanni baarigaara'ya qeeleemmo; ate Magani'yanni qiisho tayise e"eemmo.

³⁰Magani'ya doogo guutate; Kaaliiqi qaali ximbiiwaminoho; hexxitannosirira baalaho isi wonqote.

³¹Kaaliiqa agurranna wolu Magani dino; Maganinke callu irkonkeeti.

³²Wolqa aannoehunna, doogo'ya keerunnita assannoehu Kaaliiqaati.

³³Lekka'ya geedimunnite gede kaajjishannoe; gaarrate aana wodani gede qaafisannoehu isooti.

³⁴Anga'yara ola rosiisino; camote digaana bedeedate cigile'ya kaajjishanno.

³⁵Gargadhinannita wonqokki oottoe; angakkino irkisse amaddannoe; towanyokkino jawa assitinoe.

³⁶Qaafo'ya halashshoottoe daafira, shalaqe diuwoommo.

³⁷Baarigaarra'ya shorre amadeemmo; gudummonsakkinni dihigeemmo.

³⁸Gane kare, ka'annokki gede asseenna, lekka'ya woroonni ubbanno.

³⁹Olaho wolqa oottoe; gawajjitannoere lekka'yara woroonni karootto.

⁴⁰Diinna'ya badheegge xooqqanno gede assatto; gibbannoereno gudeemmo.

⁴¹Raartanno; kaa'lannonsaha kayinni diafidhanno; Kaaliiqiwa higge raartanno; isi kayinni didawarannonsa.

⁴²Bubbe kayissanno buko gede maniisseemmonsa; gudumaalu sabbi gede kakkadeemmonsa.

⁴³Haxawarru manniwiinni gatisoottoe; dagate umo assite shoomoottoe; egennoommokki gosano gashshantinoe.

⁴⁴Ani yoommore macciishshitanni heedhenni hajajantannoe; wole gobba mannino anga aannoe.

⁴⁵Insa wolqa hooggu; ri'inowiinni huxidhanni fultu.

⁴⁶Kaaliiqi Heeshshonniho! Golo'ya ikkino Magani galatamo! Gatisannoe Magani ayirro!

⁴⁷Rabba qolannoe Magani, daga anera woroonni galtanno gede assanno.

⁴⁸Diinna'ya anganni gatisinoehu isooti; Kaaliiqa ati gawajjitannoerira iimaanni qolittoe. Kaajjadu manni anganni gatisoottoe.

⁴⁹Kunnira, Kaaliiqa! Ate dagate mereero galateemmohe; su'makkino faarsotenni guwiseemmo.

⁵⁰Moohisinosihura jawa qeelle aanno; buurinoha bagamannokki baxillinni baxannosi; Daawitinna sirchosino hakko baxillinni baxannonsa.