Read Sidama_Qullaawa _Maxaafa FAARSO 26 Bible Online

FAARSO 26 - Sidama_Qullaawa _Maxaafa bible

FAARSO 26

¹DAAWITI FAARSO Kaaliiqa ballo, wodani'ya keeraanchimma, ka'anna kawa yuummokkinni, ate addaxxoommota la'e halaale coyi'rie.

²Kaaliiqa, fonqolie; qonqolchite laie; wodana'yanna hedo'ya keeraancho assie.

³Maarokki alba'yaanni noona, halaalikkinni hee'reemmo.

⁴Kaphaanote songo disongeemmo; lawisiisaanote ledo dihoseemmo.

⁵Bushuullu xaado makki're giweemmo; cubbaataammu ledo diofolleemmo.

⁶Kaaliiqa, beebbatewiinni xeerti'roommota egensiisate, anga'ya hayishshi'reemmo; ate magansi'rate kakkallanni darga mare doyemmo.

⁷Galatu faarso faarsanni, maalalekki baala duduweemmo.

⁸Kaaliiqa, ayirrinyikki hee'rannowa, minekki baxeemmo.

⁹Cubbaataammu ledonna, manna shitannori ledo huntootie;

¹⁰angansara xagarro no; qiniiticho angansarano gubbo wo'mitino.

¹¹Ani kayinni halaalaanchohona, gatisie; mararie.

¹²Uweemmokkiwa taalo darga uurroommona, Kaaliiqa ate, songote mereero galaxxeemmohe.