Read Sidama_Qullaawa _Maxaafa FAARSO 31 Bible Online

FAARSO 31 - Sidama_Qullaawa _Maxaafa bible

FAARSO 31

¹FAARSAANOTE ROORRICHITA DAAWITI FAARSO Kaaliiqa eeggate, ate addaxxoommona, saalfachishshootie; keeraanchimmakkinni gatisie.

²Huuccatto'ya macciishshite, rakke gatisie; kinchu golonna jawaata qiisho gede ikkite gatisie.

³Goli'yanna qiisho'ya ateetina, su'mikki daafira yite suwashsho doogo qolte ha'risie.

⁴Ati eeggo e'nanniwaatina, baarigaarra'ya wortinoe woshshaado giddonni fushshie.

⁵Halaalu Magano Kaaliiqa gatisoottoehu ateetina, lubbo'ya angakki wodheemmo.

⁶Haafu maganna hoode hadhannore giwatto; ani kayinni ate addaxxeemmo.

⁷Qarra'ya afootto; shetto'yano laoottona, bagamannokkihu baxillikkinni tashshi yaannoe.

⁸Baarigaarra'ya angara sayisse dioottoe; qarru nookkiwa faffote darga massite woroottoe.

⁹Kaaliiqa eeggate, qarramoommona mararie; wi'late batinyinni kainohunni ille'ya jaaroortu; lubbo'yanna maali'ya daafuri.

¹⁰Heeshsho'ya dadillunni, diri'ya wi'latenni goofi; bunshe'yanni kainohunni wolqa'ya daafurtu; miqqa'yano daaqqu.

¹¹Baarigaarra'ya baala, roorenkanni ollii'ya giddo noori qacifattannoe; egentinoeri la"a saalfattannoe; doogote xaaddannoeri xooqqannoe.

¹²Reyino manni gede ikke hawamummo; hiiqqamino uduunnichi gede ikke tugamummo.

¹³Lowo manni anera gano gane, shaaera ma'lanno; hashaashamansa macciishshummota, waajjillu doyisse amadinoe;

¹⁴Kaaliiqa, ani kayinni ate addaxxeemmo; «Ate Magano'yaati» yeemmo.

¹⁵Heeshsho'ya wo'manti angakki no; baarigaarra'ya anganninna shorritannoeriwiinni gatisie.

¹⁶Ane soqqamaanchokki shaqqillunni laie; bagamannokkihu baxillikkinni gatisie.

¹⁷Kaaliiqa ballo, ate woshshi'reemmona, saalfachishshootie; bushuullu kayinni saalfatto; jeennaate e'e sammi yito.

¹⁸Wolqatenninna boo'natenni, keeraano mishshanni coyidhanno kaphaano afii beewo.

¹⁹Ate ammantinoriranna ayirrissannoherira, mannu albaanni qixxeessoottoti ellekki hiitto batidhinote!

²⁰Ledonsa heedhe gano gantannoriwiinni golattonsa; baarigaarransa arrawinni minekki maaxxe gatisattonsa.

²¹Baarigaarra'ya gaangeessiteennae noommowa, bagamannokkiha baxillesi leellishinoehu Kaaliiqi galatamo.

²²Ani masillunni kainohunni, albikkinni xeerti'roommoha lawinoe; atewa hige raarummota kayinni, huuccatto'ya macciishshittoe.

²³Keeraano baala, Kaaliiqa baxxesi; Kaaliiqi halaalaasine agarannonsa; boonaleeyye lowo geeshsha qorichishannonsa.

²⁴Kaaliiqa addaxxitinanniri baalunku, jawaatte; wodani'neno masoonke.