Read Sidama_Qullaawa _Maxaafa FAARSO 35 Bible Online

FAARSO 35 - Sidama_Qullaawa _Maxaafa bible

FAARSO 35

¹DAAWITI FAARSO Kaaliiqa ballo! Gibbannoere giwi; qassannoere qasi.

²Siwiilu uddano uddidhe, wonqo amaxxite, dagge gatisie.

³Bagadokki adhite shorritannoeri doogo cufi; aneno, «Lubbokki gatiseemmohe» yiie.

⁴Shitaera hassannore baala saalunna shollinyu amadannonsa; anera busha heddannori irraabbe badhera higgo.

⁵Kaaliiqi sokkaasinchi shorrannansa, diilallote tungoonni kuri gede ikkito.

⁶Kaaliiqi sokkaasinchi shorre ganannansa, doogonsa shalaqonna tunsicho ikkito.

⁷Beebbatenni huntaera woshshaadonsa wortinoena, ane amaddara qile bale untinoena,

⁸hedeweelcho dano iillitonsa; untino bale egemmitonsa.

⁹Hatte yannara, anera Kaaliiqinni tashshi yaannoe; gatisasinnino hagiidheemmo.

¹⁰Wo'mu wodani'yanni, Kaaliiqa, «Ate gedeehu ayi no? Ati, gadadaamo wolqaataamu anganni, buxicho gawajjannohu anganni gatisatto» yeemmo.

¹¹Bushuullu beebbatenni bushiishshue; afoommokkirira kaphunni naqqassue.

¹²Danchumma bunshetenni qoltue; aneno callachishshue.

¹³Ani kayinni insa xiwantu yannara lowo geeshsha dadilloommo; ita aga agure umo'ya goddaasoommo; umo'ya heeshshi asse insara huuccoommo.

¹⁴Jaali'yaranna rodii'yara ikkeemmo gede ikkoommonsa; ama shii'rinohu gede hururame wi'loommo.

¹⁵Insa kayinni ani qarramummo yannara qacifattaera shiqqino; egennoommokki manni gaangeessinoe; agurtannokkiha gantinoe.

¹⁶Yawaawulootu qacifattinoe; sammi yite hinko ga'midhinoe.

¹⁷Kaaliiqa! Mamooti geeshsha sammi yite la"attoe? Ane doobbiyu gede gawajjitannoriwiinni gatisie.

¹⁸Hakkawoyite Kaaliiqa! Lowo songo mereero galaxxeemmohe; lowo manni mereerono ayirriseemmohe.

¹⁹Iimi uullanni ka'e gibbannoerira tashshi yoonkensa; beebbatenni gibbannoeri aana'ya qeexaa'litanno gede assitootie.

²⁰Afiinsanni danchu coyi difulanno; manna iillannokki mannira busha maltanno.

²¹«Hii"i, kune hawallella loosokki anfummo!» yitanni, su'ma huntue.

²²Kaaliiqa'ya! Ati afoottona sammi yitooti; Mootichi'ya ballo anewiinni faffooti.

²³Xaano Mooticha'ya ka'e halamie; Magano'ya ballo coyi'ramie.

²⁴Kaaliiqa Magano'ya keeraanchimmakki garinni su'ma'ya seekki; aana'ya qeexaa'litanno gede assitooti.

²⁵«Xa hashshu lubbonke hagiidhitino» yitoonke; qolteno, «Gabbi assinoommosi» yite coyidhoonke.

²⁶Qarrame hee'reenna hagiidhitannori saalfatto; mitteenni ti'maa'mito; ane aana boo'nitannori saalanna shollinye uddidho.

²⁷Keeraanchimma'ya affara baxxannorira kayinni, tashshi yoonsa; wo'manka woyite hagiidhitanni, «Soqqamaanchisi keere baxannohu Kaaliiqi, ayirradoho» yito.

²⁸Hatte yannara barra wo'ma, arrawi'ya keeraanchimmakkinna galatakki kulanno.