Read Sidama_Qullaawa _Maxaafa FAARSO 40 Bible Online

FAARSO 40 - Sidama_Qullaawa _Maxaafa bible

FAARSO 40

¹FAARSAANOTE ROORRICHITA DAAWITI FAARSO Kaaliiqa cincatenni agadhoommo; isino caaqqi yiinoe; raare'yano macciishshie.

²Fullannikki booninni, rirriwu giddonni fushshinoe; lekka'yano kinchu aana uurrisinoe; qaafo'yano suwisinoe.

³Maganinkera ikkitannota haaro faarso afii'yara worino; konne coye lae lowo manni waajjanno; Kaaliiqano addaxxanno.

⁴Kaaliiqa addaxxitannori, boonaleeyyete ledo hossannokkirinna kaphu maganna magansidhannokkiri maassantinoreeti.

⁵Kaaliiqa Magano'ya assootto dhagge lowote; ate gedeehu horontanni dino; ati ninkera maala'linanni coye hedoottonke; hasaawenna coyi're gude diafeemmo!

⁶Kakkalonna fushshaate dihasi'ratto; shilqonnitanna cubbu daafira shiqinshanni kakkalo dixa'mi'ratto; roorenkanni ati yaattota macciishshitanno macca oottoe.

⁷Hatte yannara, «Kuneeti dayommo; anere Seeru Maxaafira borreessinoonni;

⁸Magano'ya hedokki wonshammora baxoommo; seerikkino wodani'yara no» yoommo.

⁹Mannikki songinowa keeraanchimmakki duduweemmo; Kaaliiqa, afoottonte gede afoo'ya gamba diassi'roommo.

¹⁰Assite gatisoottoe gara dimaaxoommo; ammanamakkinna keeraanchimmakki songote mereero duduweemmo; bagamannokki baxxillekkinna halaalekki kula diagureemmo.

¹¹Kaaliiqa maarokki anewiinni xeertissooti; bagamannokki baxillikkinna halaalikki wo'manka woyite agaroe.

¹²Kiiro anfoonnikki bunshe doyissitinoe; cubbu amadeennae la"a hoogoommo; kiiro umi'ya danancho rooreenna hexxo ba'inoe.

¹³Kaaliiqa, eeggatena gatisie; Kaaliiqa rakke kaa'lie.

¹⁴Lubbo'ya huntara hasidhannori irraabbo; qeelanto; qarrameenna hagiidhitannori saalfatte badhera higgo.

¹⁵«Hii"i» yitannoeri, Kaaliiqi qeeleennansa saalfatte huxuxxi yito.

¹⁶Ate hasidhannori baalu hagiidhito; tashshino yoonsa; gatisaanchimmakkira galaxxitannori wo'manka woyite, «Kaaliiqi lowoho!» yito.

¹⁷Mooticha'ya ani gadadaamohonna buxichoho; ati kayinni dihawoottoe; kaa'laancho'yanna gatisaancho'ya ikkoottohura rakke kaa'lie.