Read Sidama_Qullaawa _Maxaafa FAARSO 59 Bible Online

FAARSO 59 - Sidama_Qullaawa _Maxaafa bible

FAARSO 59

¹FAARSAANOTE ROORRICHIRA HUNTOOTI YITANNO HUURONNI SAAOOLI SHITANNOSIRE MINISIRA SOYI YANNARA DAAWITITA MURGOTE FAARSO Magano ballo, baarigaarra'yawiinni gatisie; gawajjitaera ka'annoriwiinni agarie.

²Busha assitannoriwiinni gatisie; mannu mundee aggannoriwiinni agarie.

³Kaaliiqa! Cubbonna sao assummokkinni shitaera gaa'lite agarte no; kuri mararro nookkiri gamba yite anera gano gantanno.

⁴Sao assummokkinni shorrite amaddaera ariiffattanni noona, ati ka'e kaa'lie; noommo garano dagge illekkinni lai.

⁵Olantote Magano ikkoottohu, Israeelete Magano Kaaliiqa, daga baalanta qorichishattora kai; sayisse hirtannore bushuulle baala marartooti.

⁶Hawarro tuqa hudi'rino woshshi gede, katama doyitanni soroortanni hosse higganno.

⁷Kuneeti boollaqi'ransa macciishshi; arrawinsa bagadu gede qasannoho; anfanninsahano dilawannonsa.

⁸Kaaliiqa ati, insa oso'latto; daga baalanta qacifatatto.

⁹Magano! Ati jawaante'yaatina, addaxxeemmohe.

¹⁰Bagamannokki baxillihu Magani'ya daye la"annoe; baarigaarra'ya qeelantanna leellishannoe.

¹¹Kaaliiqa wonqo'ya! Manni'ya rabbisoottota afa hoogannona insa shitooti; kayinnilla, wolqakkinni billaallisi; shollishi.

¹²Afiinsa cubbiranna suumensanni fultanno so'rora, rumonna kaphu afiinsanni fulanno daafira, boo'nansanni amadanto.

¹³Insa hanqikkinni huni; shakki assite gudi; Maganu Israeeletenni sae baatto baalate gashshaancho ikkinota, baalunku hakkawoyite affanno.

¹⁴Hawarro tuqa hudi'rino woshshi gede, katama doyitanni soroortanni hosse higganno.

¹⁵Insa sagale hasi'ranni raataawannonna, hooge gurura"anno woshshi gedeereeti.

¹⁶Ani kayinni ate jawaantekki daafira faarseemmohe; qarramummo yannara ati golonna qiisho ikkoottoena, soodimaroho bagamannokkihu baxillikki daafira yee geeweemmohe.

¹⁷Gargaraancho'ya! Ati anera golo'yaati; baxattoe Maganootina, ate Magani'yara faarseemmohe.