Read Sidama_Qullaawa _Maxaafa FAARSO 7 Bible Online

FAARSO 7 - Sidama_Qullaawa _Maxaafa bible

FAARSO 7

¹BIINIYAAMICHU KUUZI QAALI DAAFIRA DAAWITI KAALIIQIRA FAARSINO FAARSO Kaaliiqa Magano'ya, goli'ya ateetina, shorritannoeri baaluwiinni gatisse fushshie.

²Ati gatisa hoogittoero kayinni, doobbiyu gede dukke massite, hoolannohu nookkiwa cancantannoe.

³Kaaliiqa Magano'ya ballo, dancha assinoehura busha qoloommoro, baarigaarra'yano beebbatenni mulqi'roommoro, tenne bunshe baalate giddonni assoommori hee'riro,

⁵baarigaari'ya shorre amade, umo'yano baattotenni xaadise, bukote aanano diriirse aguroe.

⁶Kaaliiqa ballo, aarikkinni kai. Baarigaarra'ya hanqi aana kai; halaalaancho yoo hajajoottote garinni, Magano'ya ballo, ka'e kaa'lie!

⁷Daga baala gamba assidhe, iima heedhe aanansa moohi.

⁸Kaaliiqi daga baalate yoo yaanno; Kaaliiqa ballo, keeraanchimma'yanna ammanama'ya garinni yiie.

⁹Mulenna mudukko afattohu halaalaanchu Magani, cubbaataammu bunshe huni; keeraanote kayinni ba'raasinsa.

¹⁰Maganu wonqo'yaati; wodana subbinore gatisannonsa.

¹¹Maganu halaalaancho daanyaati; bunshete coyira wo'ma woyite hanqanno.

¹²Bunshetenni higa gibbannorira bise gamaxi'ranno; digaanano injeessi'ranno.

¹³Shaate bagado qixxeessi'ranno; giirate gede bubbanno urde alba qo'lanno.

¹⁴Cubbaataamu bunshe godowe, qarra gamaa'me, xagarro ilanno.

¹⁵Wolootaho bale umanno; umino balera isinni uwanno.

¹⁶Bunshesino umisira higganno; xagarrosi umosi gawajjitanno.

¹⁷Kaaliiqa, halaalaanchimmasi daafira, galateemmosi; Wo'munkura Aliidi Maganira galatunni faarseemmo.