Read Sidama_Qullaawa _Maxaafa FAARSO 71 Bible Online

FAARSO 71 - Sidama_Qullaawa _Maxaafa bible

FAARSO 71

¹Kaaliiqa! Ati golo'yaatina, horonta saalfachishshootie.

²Keeraanchimmakkinni gatisse fushshie; huuccatto'ya macciishshite gatisie.

³Ati goda'yaatinna golo'yaatina, balba'leemmowanna jawaata qiisho ikkite gargarie.

⁴Magano'ya ballo, bushuullu anganni, cubbaataammunna kaajjadduwiinni gatisie.

⁵Mooticha! Ati hexxo'yaati; Kaaliiqa! Ati anje'yanni kayisse addaxxeemmoheho.

⁶Ilamummo barrinni kayisse ati agaroottoe; heeshsho'ya diri baalunkunni ate irki'roommo; anino wo'manka woyite galaxxeemmohe.

⁷Ati jawaata golo ikkoottoehura, ani lowo mannira lawishsha ikkoommo.

⁸Barra wo'ma ayirrinyikkira faarseemmo gede, afii'yara galatu wo'minoe.

⁹Geedhimma'ya yannara huntootie; wolqa gooffannoe waro agurtootie.

¹⁰Baarigaarra'ya anera busha mala maltanno; shitaera hassannori anera gano gantanni,

¹¹«Maganuno agurinosi; gatisannosihuno dinona, faana gantine amadde» yitanno.

¹²Magano'ya! Anewiinni faffooti; Magano'ya! Rakke kaa'lie.

¹³Lubbo'ya hettissannori irraabbe gooffo; gawajjameemmota baxxannori saalanna shollinye uddidho.

¹⁴Ani kayinni wo'manka woyite hexxeemmohe; lede lede galaxxeemmohe.

¹⁵Loosikki kiirre gundannikkiha ikkiro nafa, afii'ya barra baala keeraanchimmakkinna gatisaanchimmakki coyi'ranno.

¹⁶Kaaliiqa Magano'ya ate jawaantenni ha'reemmo; keeraanchimmakki calla lallaweemmo.

¹⁷Magano'ya anje'yanni kayisse rosiisoottoe; anino techo geeshsha dhaggenniha loosokki duduwanni noommo.

¹⁸Geedheemmonna awuuweemmo woyiteno, dagganno ilama baalate roorrekkinna wolqakki kuleemmona, Magano agurtootie.

¹⁹Magano! Keeraanchimmakki gordo iillitanno; ati jawa looso loosootto; Magano! Ate gedeehu dino.

²⁰Lowo qarranna shetto leellishoottoe; ikkollana, galagalchite wolqa'ya haaroonsootto; balete giddonnino fushshattoe.

²¹Albinni roore ayirrado assattoe; galagalchite jawaachishattoe.

²²Anino halaalaanchimmakki daafira, baganunni galateemmohe. Israeelete Qullaawa Magano! Maasinqotenni faarseemmohe.

²³Gatisoottoe daafira galatunni faarseemmohe; afii'yano hagiirrunni ilillisanno.

²⁴Gawajjameemmota baxxannori saalfattannonna shollitanno daafira, arrawi'ya barra wo'ma keeraanchimmakki duduwanno.