Read Sidama_Qullaawa _Maxaafa FAARSO 72 Bible Online

FAARSO 72 - Sidama_Qullaawa _Maxaafa bible

FAARSO 72

¹SELEMOONI FAARSO Magano! Moote halaalunni gashshanno gede assi; mootete keeraanchimmakki rosiisisi.

²Kunni garinni mannakki taashshe gashshanno; qarraataammikkirano halaalaancho yoo yaanno.

³Mannikkira ilaalla jiro, gaarrano keeraanchimmate guma uyitanno.

⁴Moote buxanete halaale coyi'ro; gadadaamma kaa'lo; gadadissannore irraawiso.

⁵Kaaliiqa! Arrishsho fultanno diro baala, aganu xawanno yanna baala, ilamatenni ilamate geeshsha, mannikki magansi'rohe.

⁶Mooteno xawoho gananno xeeninna baattote uwanno shori gedeeha ikko.

⁷Isi gashshooti yannara keeraano qawaaxxidho; aganu ba"a geeshsha jiro batidho.

⁸Baarunni kayise baaru geeshsha, Efiraaxisi Wayinni kayise baattote qacce geeshsha gashsho.

⁹Halalla heedhanno gosa isira kumbuultanno; diinisino bushsha afooho wodhanno.

¹⁰Terseesinna giddichuwate mootoolla giwire abbitosi; Arabetenna Saaba mootoolla afansha haadhe daggosi.

¹¹Mootoolla baala kumbuultosi; daga baalanti gashshantosi.

¹²Qarraataamo woshshi'rannosi woyite gatisannosi; buxichonna gadadaamo kaa'lanno.

¹³Buxanenna wolqiweeloota mararanno; qarraataamma reyotenni gatisanno.

¹⁴Insa heeshsho isi albaanni ayirrado ikkitino daafira, gadadaamma shettotewiinni fushshannonsa.

¹⁵Dirisi seedo; Arabete gobbanni culka abbitosi; wo'mante yannara mannu isi daafira huucco; wo'manka woyite Maganu maasso iillitosi.

¹⁶Baatto gide laashshito; ilaallate aana jajju wo'mo; Libaanoosi ilaalla gede qiniitunnita ikkito; hayisso baatto guggushshitannohu gede, katammateno mannu wo'mo.

¹⁷Su'misi hegerera maassaminoha ikko; su'misi arrishsho heedhanno geeshsha hee'ro; baattote aani daga baala isinni maassanto; daga baala, «Isi maassammoho» yitanno.

¹⁸Callisi dhagge assannohu, Israeelete Magani Kaaliiqi galatamo.

¹⁹Galataminohu su'misi hegere hegerera maassamo; galatisino baatto baala wo'mo! Hamii'ni! Hamii'ni!

²⁰Isseyi beetti Daawiti huuccatto gooffu.