Read Sidama_Qullaawa _Maxaafa FAARSO 85 Bible Online

FAARSO 85 - Sidama_Qullaawa _Maxaafa bible

FAARSO 85

¹FAARSAANOTE ROORRICHIRA QORE OOSO FAARSO Kaaliiqa! Gobbakkira dancha coye malootto; Yaiqoobi sircho galagalchite duroonsootto.

²Mannikki cubbono maarootto; saonsa baala aguritto.

³Aarakkino badhera qolootto; hanqokki uurrisootto.

⁴Magano gatisaanchonke ballo, haaroonsinke; hanqokkino aaninkenni badhara qoli.

⁵Halaalintanni hanqoottonke gedeenni hegerera keeshshatto? Hanqikkira gawalo dinoni?

⁶Hagiidhe ate galatanno gede, mannakki galagalchite haaroonsinke.

⁷Kaaliiqa ballo, bagamannokkiha baxillekki leellishinke; kaa'lite gatisinke.

⁸Maganu Kaaliiqi coyi'rannore macciishsheemmo; isiwa higginorira, «Keere eemmo'ne» yaannonsa.

⁹Ayirrinyisi baattonkera hee'ranno gede, isino ayirrissannosire gatisate qixxaawaho.

¹⁰Bagamannokkihu baxillikkinna halaalu xaaddanno; keeraanchimmanna keeru sunqantanno.

¹¹Mannu ammanama baattote aaninni iimira higge ka'anno; Maganu keeraanchimma gordoho heedhe la'anno.

¹²Kaaliiqino danchare aanno; baattonkeno dancha guma laashshitanno.

¹³Keeraanchimma Kaaliiqi albaanni hadhanno; qaafosirano doogo qixxeessitanno.