Read Sidama_Qullaawa _Maxaafa FAARSO 96 Bible Online

FAARSO 96 - Sidama_Qullaawa _Maxaafa bible

FAARSO 96

¹Kaaliiqira haaro faarso faarse; baattote aana heedhinanni gosa baala Kaaliiqira faarse.

²Kaaliiqira faarse; iso galatte; barru barrunku gatisaanchimmasi dudubbe.

³Dagate ayirrinyesi lallabbe; dhaggesino gosa baalate kulle.

⁴Kaaliiqi lowoho; lowo galati hasiisannosiho; wole maganna baalantenni roore ayirradoho.

⁵Wole gosa magansidhannoti kaphu magannaati; Kaaliiqi kayinni gordo kalaqinoho.

⁶Ayirrinyunna gaamaarre gaangeessitinosi; jawaantenna xumme Qullaawa Minesi no.

⁷Mannu sirchi baalu Kaaliiqa galatte; ayirrinyisinna jawaantesi daafira guwissesi.

⁸Kaaliiqiha ayirrado su'ma galatte; fushshaate haadhine Minisira abbe.

⁹Qullaawu Magani leellanno woyite magansidhesi; baattote aana heedhanno gosa baala albasiinni qece yite huxidho.

¹⁰Daga baalate, «Kaaliiqi mootete; kalqe shashshafantannokki gede kaajjite uurritino; dagano taashshe gashshanno» yitine kulle.

¹¹Gordu hagiidho; baattoteno tashshi yoose; baarunna giddosi noori baalu harqo.

¹²Gatunna gate noori baalu hagiidho; hatte yannara dubbu haqqe baala hagiirrunni faarsito.

¹³Kaaliiqi baattote aana yoo yaara daanno; manna baalaho taalonna halaalaancho yoo yaanno.