Read Sidama_Qullaawa _Maxaafa LAWISHSHA 10 Bible Online

LAWISHSHA 10 - Sidama_Qullaawa _Maxaafa bible

LAWISHSHA 10

¹Selemooni lawishshuwa kunninni aante noote: Egennaamu beetti annasi hagiirsiisanno; hawanyu kayinni amasi dadillisanno.

²Hanaanqe afi'nanni jiro hornya di"ikkitanno; danchumma assa kayinni reyotenni gatissanno.

³Kaaliiqi keeraano hudidhanno gede diassanno; bushuullu halcho kayinni wo'mitannokki gede assanno.

⁴Cee'ma buxissanno; jaate loosi'ra kayinni duroonsitanno.

⁵Busulu manchi gide yannatenni gamba assi'ranno; gide gamba assi'nanni yannara, goxannohu kayinni shollinyeho uwanno.

⁶Keeraancho mannu baalu maassi'rannosi; bushu kayinni coyisinni bunshe maaxi'ranno.

⁷Danchu manni qaanganna hee'ranno; bushuullu kayinni hakkawoyintenni hawantanno.

⁸Egennaamu kulloonni amaale adhanno; haafare coyi'rannohu kayinni umosi hunanno.

⁹Taalu wodanihu yaaddo nookkiha ha'ranno; yawaawulu kayinni bunshesinni amadamanno.

¹⁰Halaale mogannohu qarra kalaqanno; xawoho coyi'rannohu kayinni keere abbanno.

¹¹Keeraanchu manchi coyi heeshshote buichooti; bushu kayinni coyisinni bunshe maaxi'ranno.

¹²Gibbo koma kalaqqanno; baxillu kayinni so'ro baala diwanno.

¹³Hayyo egennaamu manchi afiinni fultanno; wodancha noonsakkirira kayinni qorichu malinonsa.

¹⁴Egennaammu egenno duu'nitanno; gowwootu afii kayinni bao abbanno.

¹⁵Dureeyye jironsa, qiishote gede ikkite agartannonsa; buxane kayinni buximansa huntannonsa.

¹⁶Danchumma heeshsho uyitanno; cubbu kayinni cubbolla ledanno.

¹⁷Seejjo adhannohu heeshsho afi'ranno; seejjamannokkihu kayinni so'rote uwanno.

¹⁸Koma giddo maaxi'rannohu kaphaanchoho; heme wixanno manchino gowwaho.

¹⁹Lowo coyi giddo so'ro dihoogganno; egennaamu manchi kayinni arrawosi eemadhanno.

²⁰Keeraanchu manchi coyi, daashshinoonni birri gedeeho; bushu manchi hedo kayinni mulla haafaho.

²¹Keeraanchu manchi arrawi lowo manna dhaawanno; gowwootu kayinni wodancha hoogansanni reyitanno.

²²Kaaliiqi maasso jiro abbitanno; aanahono mitiimma dileddanno.

²³Gowwu bunshe assatenni hagiidhanno; wodancha noosihura kayinni egenno afi'ra tashshi yitannosi.

²⁴Keeraano halchitinore afidhanno; bushuulle kayinni waajjitinori amadannonsa.

²⁵Hombobolatte ka'anno yannara, bushuulle fiite haadhe hadhanno; keeraano kayinni wo'manka woyite kaajjite heedhanno.

²⁶Shiishu hinko shilli assannonte gedenna, wiliile ille huntannonte gede, cee'maleessuno loosoho wodhinosiha hifachiishanno.

²⁷Kaaliiqa waajja diro seedissanno; bushuullu kayinni yanni-male reyitanno.

²⁸Keeraanote hexxo hagiirre uyitanno; bushuullu hexxo kayinni mullare ikkite gattanno.

²⁹Kaaliiqi keeraano agarannonsa; bunshe assitannore kayinni hunanno.

³⁰Keeraano noowa keere heedhanno; bushuullu kayinni baattote aaninni ba'anno.

³¹Keeraanote arrawinni egenno fultanno; shokkashshu arrawi kayinni muramanno.

³²Keeraanote afii coommannore coyi'ranno; bushuullu afiinni kayinni sarraaqu fulanno.