Read Sidama_Qullaawa _Maxaafa LAWISHSHA 11 Bible Online

LAWISHSHA 11 - Sidama_Qullaawa _Maxaafa bible

LAWISHSHA 11

¹Kaaliiqi hanaaqu keenaasincho giwanno; taalo keenaasincho kayinni baxanno.

²Boo'nate hoode shollinyu daanno; umo heeshshi assa egennote.

³Suwadda sumbensa massaggannonsa; shokkadda kayinni yawaawullensa huntannonsa.

⁴Maganu hanqanno barra jiro dikaa'litanno; keeraanchimma kayinni reyotenni gatissanno.

⁵Danchu manchira keeraanchimmasi doogo suwissannosi; bushu kayinni umisi cubbinni ba"anno.

⁶Keeraancho mancho halaalaanchimmasi gatissannosi; yawaawula kayinni busha yortosi woshshaaddannosi.

⁷Bushu reyanno woyite, hexxosino ledo reyitanno; hexxino jiro baala mullare ikkite gattanno.

⁸Keeraanchu qarrunni gatanno; bushu kayinni qarru aana uwanno.

⁹Bushu manchi arrawisinni olliichosi gawajjanno; danchu manchi kayinni egennosinni gatanno.

¹⁰Keeraanote qinaannonsa yannara katamu hagiidhanno; bushuullu reyitanno woyite ililleette ikkanno.

¹¹Halaalaanchu maassamanni katamu lophanno; bushuullu arrawi kayinni bao abbanno.

¹²Wodancha xe'inohu, arrawisinni manna mishanno; wodancha noosihu kayinni afoosi eemadhanno.

¹³Hemaanchu maanxoonnire xawo fushshanno; ammanamino manchi kayinni fojo maaxanno.

¹⁴Mala afidhinokki gosa ubbanno; malanno manni haammatiro kayinni keere afi'nanni.

¹⁵Anfoonnikkihura waase ikka qarra abbitanno; waasete anga wodhannokkihu gatanno.

¹⁶Godowa shaqqado mancho ayirritanno; mararro noosekkiri kayinni jirolla gamba assidhanno.

¹⁷Wolootaho shaqqa meessanaa kaa'litanno; mararro hooga kayinni anna umosi gawajjitanno.

¹⁸Busha mancho gamba assi'rannori dikaa'lannosi; keeraanchu kayinni halaalu woxe afi'ranno.

¹⁹Keeraanchimma cu'mi're hee'rannohu, heeshsho afi'ranno; bunshete hoode ha'rannohu kayinni reyanno.

²⁰Kaaliiqi busha hedo noonsare giwanno; halaalaancho doogo hadhannore kayinni baxanno.

²¹Bushu manchi horonta qorichishamikkinni digatanno; keeraano kayinni gattanno.

²²Wodancha noosekki mancho afidhino xumme, manchaamete sanora worroonni cuuicho ledo mittete.

²³Keeraanote halcho danchumma callate gawa'litanno; cubbaataammu halcho kayinni bao abbitanno.

²⁴Mitu mitu manni shaqqillunni woxesi fincanno; ikkirono jirosi batidhanno. Deerrimale honqooqoo'mannohura kayinni, buxima lexxitannosi.

²⁵Elannohu duroo'manno; wole duushshannohu duuwanno.

²⁶Lexxara yee gide duu'nannoha mannu rumanno; fushshe hirannoha kayinni maassi'ranno.

²⁷Dancha coye hasi'rannohu, dancha coye afi'ranno. Bunshe hasannohu kayinni, bushu coyinni xaadanno.

²⁸Durummasi addaxxanno manchi darote gede giggilanno; keeraanchu kayinni danchu kaashshi gede latanno.

²⁹Mini manna qarrisannohu insawiinni mittoreno diragi'ranno; gowwu egennaamoho soqqamannoha ikkanno.

³⁰Keeraanchimma heeshsho uyitanno; haxawarrimma kayinni barra haransitanno.

³¹Keeraano loossinoha baattote aana heedhe mixxitannoha ikkiro, bushuullunna cubbaataammu loossino bunshera, mageeshshire mixxita ikka!