Read Sidama_Qullaawa _Maxaafa LAWISHSHA 12 Bible Online

LAWISHSHA 12 - Sidama_Qullaawa _Maxaafa bible

LAWISHSHA 12

¹Seejjo baxannohu egenno baxanno; seejjamannokkihu kayinni jallaagaho.

²Keeraano Kaaliiqi baxanno; bunshe heddannore kayinni qorichishanno.

³Bunshe loosanno manchi dese'e yee hee're diafanno; keeraanchu kayinni noowa teese hee'ranno.

⁴Dancha mancho ayiddaannisera ba'lattote; saaliweelo galte kayinni ayiddaannisera miqichu dhibbaati.

⁵Danchu manni hedo suwashshote; bushuullu mali kayinni xagarrote.

⁶Bushu manni arrawi manna shaate malanno; danchu manni hasaawi kayinni reyotenni gatisanno.

⁷Bushu manni higannokki gede ikke ba"anno; keeraanote ilama kayinni hegerera heedhanno.

⁸Mannu egennosinni galatamanno; wodana shokkashshu kayinni mishamanno.

⁹Noori nookkiha afi'raamo lawe naaxxanno manchinni, umosi heeshshi asse loosi're hee'ranno manchi woyyate.

¹⁰Keeraanchu manchi saadasi nafa mararanno; bushu wodani kayinni mararro diafi'rino.

¹¹Loosi'ranno manchi sagale duuwe itanno; mullawa hosannohu wodana ajinoho.

¹²Bushu manni wo'manka woyite bunshe assate halchanno; keeraano rumushsho seeddino haqqe gedeereeti.

¹³Busha mancho coyi'rino coyi amadannosi; keeraanchu manchi kayinni qarrunni gatanno.

¹⁴Mannu afiisi danchummanni atoote afi'ranno; loosi'rino garinni malinosire adhanno.

¹⁵Gowwaho umisi doogolla gara labbannosi; egennaamu kayinni amaallannire adhanno.

¹⁶Gowwu hanqi hakkawoyintenni leellanno; egennaamu manchi kayinni xonnoonnisi xono mishe aguranno.

¹⁷Halaalaanchu manchi afinore coyi'ranno; kapho naqqasannohu beebba coyi'ranno.

¹⁸Dayi gede coyi'nanni coyi manna urdete gede qasanno; egennaamu arrawi kayinni hursanno.

¹⁹Kaphu shiima yannalla keeshshanno; halaalu kayinni hegerera hee'ranno.

²⁰Bunshe malanno manni wodanira xagarro no; keeru hee'rannota maltannori kayinni hagiirre afidhanno.

²¹Keeraano mitiimma diamaddannonsa; bushuulleho kayinni qarru bati'rannonsa.

²²Kaaliiqi kapho coyidhannore giwanno; halaalaasine kayinni baxannonsa.

²³Egennaamu manchi egennosi diku'lanno; hawanyu kayinni gowwimmasi leelliwa duduwanno.

²⁴Jaate loosi'ra mannaho aliidiha assitanno; cee'ma kayinni borojjimmate tugganno.

²⁵Wodanu yaaddo dadille abbitanno; danchu hasaawi kayinni hagiirsiisanno.

²⁶Keeraanchu manchi jaalisira dancha mala aanno; bushu manchi kayinni halaaluwiinni xeertisanno.

²⁷Cee'maleessu ugaaxe abbi'rinoha nafa du'rishi're di"itanno; jaate loosi'rannohu kayinni qiniite afi'ranno.

²⁸Keeraanchimma heeshshote doogooti; cubbo loosa kayinni reyote massitanno.