Read Sidama_Qullaawa _Maxaafa LAWISHSHA 18 Bible Online

LAWISHSHA 18 - Sidama_Qullaawa _Maxaafa bible

LAWISHSHA 18

¹Baxxara hasi'rannohu umosi calla baxanno; halaalaancho coye baala giwanno.

²Gowwu egenno afi'rate dibaxanno; umisi egenno calla kulara hasi'ranno.

³Bunshete hoode mishama dagganno; saalu ledo shollinyu daanno.

⁴Afiinni fulanno coyi diimete wayi gedeeho; egennote buichono burqanno waati.

⁵Keeraanote halaali dawanno gede, cubbaataammaho golama didanchate.

⁶Gowwa suumesi gibbote eessitannosi; afiisino gana abbannosi.

⁷Gowwa mancho afiisi hunannosi; suumesino lubbosira woshshaado ikkitannosi.

⁸Heme coommitanno sagale gede kushshi yitanni, manninatu ledo karsantanno.

⁹Looso cee'mannohu, jajja billaallisannohura rodooho.

¹⁰Kaaliiqi su'mi kinchu huxxaati; keeraanchu manchi hakkiira xooqe keere hee'ranno.

¹¹Dureeyyete jironsa qiinshoonni katami gedeeti; giddine anfannikkiha kinchu huxxa labbannonsa.

¹²Naaxxaleessu wodani bao abbanno; umo heeshshi assa kayinni ayirrinye uyitanno.

¹³Macciishshinikkinni tumo qola, gowwimmatenna shollinyeho.

¹⁴Dhiwamanno yannara manna wodanisi irkisannosi; hiiqqamino wodana kayinni duha dandaannohu nooni?

¹⁵Egennaamu wodani egenno afi'ranno; maccasino egenno macciishshitara hasidhanno.

¹⁶Afansha aannohura doogo fa'nantannosi; jajjabbu albira shiqanno gede assitannosi.

¹⁷Baarigaarisi daa geeshsha balaxe ku'lannohu, halaalaancho lawanno.

¹⁸Hixa ga'na gibbo hooltanno; wolqisino manna araarsitanno.

¹⁹Rodiikki kaa'littosiro, qiinshoonni katama ikkannohe; isi ledo giwamittoro kayinni mine cufi'rannohe.

²⁰Mannu arrawisi danchummanni godowa duuwanno; afiisinni coyi'rinore itanno.

²¹Reyonna heeshsho arrawu aana no; kunnira, mannu coyi'rinore adhanno.

²²Galte afi'rinohu maasso afi'rino; Kaaliiqiwiinnino ayirrinye adhino.

²³Buxichu shaqqillunni woxarate huucci'ranno; dureessu kayinni fenjeejje coyi'ranno.

²⁴Mitu mitu jaali dikaa'lanno; mitu kayinni fiixunni roore gamba yaanno.