Read Sidama_Qullaawa _Maxaafa LAWISHSHA 19 Bible Online

LAWISHSHA 19 - Sidama_Qullaawa _Maxaafa bible

LAWISHSHA 19

¹Kaphaanchu gowwinni, ammanamino buxichi woyyate.

²Egenno nookki laala dikaa'litanno; muddama doogo so'risiissanno.

³Mannu umisi gowwimmanni heeshshosi hu'nanno; wodanisinni Kaaliiqa abbooshshi'ranno.

⁴Dureessu lowo jaalla afi'ranno; buxichu kayinni noosinka hooganno.

⁵Kaphunni naqqasannohu qorichishamikkinni digatanno; dhara coyi'rannohuno keere difulanno.

⁶Lowo manni jajjabbu ledo baxamara hasi'ranno; anga hiixatannohura baalunku jaalaho.

⁷Buxicho fiixisi nafa gamba diassi'rannosi; jaallasi kayinni hakkiinni roore xiibbannosi. Woxaratanni hoode ha'reno diafi'rannonsa.

⁸Egenno lexxannohu umosi afinoho; wodancha afi'rinohurano qinaannosi.

⁹Kaphunni naqqasannohu qorichishamikkinni digatanno; dhara coyi'rannohuno ba"anno.

¹⁰Gowwaho mootete mine hee'ra dibiiffannosi; borojjichu ayirradda gashsha hakkiinni baassanno.

¹¹Egenno mannaho cinca uyitanno; koma amada agura ayirrinyeho.

¹²Mootete hanqi doobbiichu ittana gedeeho; mootete albaanni ayirrinye afi'ra kayinni hayissote aani loji gedeete.

¹³Gowwu beetti annaho qarra abbanno; nyerri yitanno galte xissanno mini ledo mittete.

¹⁴Minenna jiro annunna amatewiinni ragi'nanni; egennaame galte kayinni Kaaliiqiwiinni afi'nanni.

¹⁵Cee'ma lowo goxano abbitanno; loosiweelo hee'niro hude dagganno.

¹⁶Kaaliiqi hajajo agadhannohu umosi agadhanno; kulloonnire mishannohu kayinni ba"anno.

¹⁷Buxanete aannohu Kaaliiqira liqiissanno; Kaaliiqino assino danchummara daware aannosi.

¹⁸Beettokki higa dandaanno yannara seejjisi; ba"ara worte agurtootisi.

¹⁹Hanqaaleessu manchira qorichu malino; hakkiinni fushshittosiro kayinni, wole woyiteno hatto assakki digattanno.

²⁰Amaale macciishshi; seejjono adhi; hakkunni gedensaanni egennaamo ikkatto.

²¹Mannu wodani giddo lowo hedo no; hendoonniri wo'mannohu kayinni Kaaliiqi yiino garinniiti.

²²Mannuwiinni hasi'nannihu qaru coyi ammanamate; kaphaanchunkunni buxichu woyyate.

²³Kaaliiqa waajja heeshshote widira haadhe hadhanno; iso waajjannohu goxe galanno; bushu coyinni dixaadanno.

²⁴Cee'maleessu xilteho worino anga fushshe, afooho massi'rara nafa didandaanno.

²⁵Boonaleessa ganniro, hawanyu busulanno; wodancha afi'rinoha seejjiniro, egenno lexxanno.

²⁶Annasi mulqi'rannohunna amasi mininni fushshe hunannohu, saalanna shollinye abbanno.

²⁷Beetto'ya, seejjo'ya macciishsha agurtooti; hakkuyi ka'a kayinni, afoottore nafa hawatto.

²⁸Haafu naqaashshe yoote aana haariintanno; bushu manni bunshete foole baxanno.

²⁹Haariimaasinete qorichu, gowwootaho gana qixxaabbe no.