Read Sidama_Qullaawa _Maxaafa LAWISHSHA 2 Bible Online

LAWISHSHA 2 - Sidama_Qullaawa _Maxaafa bible

LAWISHSHA 2

¹Rosiisaanchu, «Beetto'ya ballo, rosiiseemmohere adhi; kuleemmohereno wodanaho wodhi.

²Maccakki egennote widira qolte, seekkite wodanchi.

³Egennote widira woxarati; wodanchano taxidhe woshshi'ri.

⁴Birra woy maaxantino jiro afi'rate wo'naa'latto deerrinni, egennono jawaatte hasi'ri.

⁵Hatto assittoro, Kaaliiqa waajjinanni gara afatto. Maganu coyeno seekkite buuxatto.

⁶Egenno aannohu Kaaliiqaati; egennonna buuxa daggannohu isiwiinniiti.

⁷Isi suwaddaho qeelle aannonsa; minshannire afidhinokkirira wonqo ikkannonsa.

⁸Taalo maltannore towatannonsa; isira ammanantinore agarannonsa.

⁹Hatte yannara gara ikkino coyi, halaalunna taashsha maatiro buuxatto; ha'ratto doogono badde afatto.

¹⁰Egennaamo ikkatto; egennokkino hagiirre uyitannohe.

¹¹Buuxe afa towattannohe; buuxa bushu coyiwiinni agartannohe.

¹²Bunshe assattokki gede gargartannohe; coyinni wodaasanno manniwiinni fafatto gede assitannohe.

¹³Kuni bushu manni, cubbu tunsichi giddo hee'rara yee, keeraancho doogo giwanno.

¹⁴Insa bunshe loosanna manna xagara baxxanno.

¹⁵Coyidhinotenni hossannokkireetinna hexxinannikkireeti.

¹⁶«Egenno, foora arrawunni dogge woshshaaddanno manchowiinni gatissannohe.

¹⁷Hattoo mancho ayiddaannisera ammanantinokkitenna Kaaliiqi albaanni e'ino gondoorono diigginote.

¹⁸Ise ledo minisera ha'ra, reyote doogo amadate; doogoseno jeennaate haadhe hadhannote.

¹⁹Isewa marannohu baalu keere dihiganno; heeshshote doogo widira hige diafanno.

²⁰«Ati kayinni, danchu manni ha'ranno doogo higge ha'ri; keeraanote doogo amadde qaafi.

²¹Tenne baattora hee'ra dandiitannori wodana subbinoreetinna ammanantinoreeti.

²²Bushuulle kayinni Kaaliiqi baattote aaninni haa're hoolanno; ammanantinokkireno buqqisanno» yii.