Read Sidama_Qullaawa _Maxaafa LAWISHSHA 20 Bible Online

LAWISHSHA 20 - Sidama_Qullaawa _Maxaafa bible

LAWISHSHA 20

¹Woyinete xajje coyi'rammicha assitanno; agu giwamaancho assanno; agaasinete hoode ha'ra gowwimmate.

²Mootete hanqi doobbiichu ittana gedeeho; iso hanqisanno manchi lubbosira reyo abbi'ranno.

³Gibbotewiinni fafa ayirrinyeho; gowwu kayinni gibbo baxanno.

⁴Cee'maleessu manchi yannatenni diloosi'ranno; gide gamba assi'nanni yannara lae hooganno.

⁵Mannu wodanira noo hedo diimete wayi gedeete; wodancha afi'rino manchi kayinni hakkiinni hinkii'lanno.

⁶Mannu baalu umisi danchumma duduwanno; ammanamino mancho kayinni maminni anfanni?

⁷Ammanaminohunnitinna halaalaanchu manchi ooso, hiitto ba'raadhinote!

⁸Yoote barcimira ofollino moote, mannu wodanira bunshe nooronna hoogginoro afanno.

⁹«Wodani'ya keeraanchoho; cubbuno dinoe» yaannohu nooni?

¹⁰Taalinokki keenaasinchinna safaraasinchi, lamunku Kaaliiqi albaanni battete.

¹¹Qaaqquullu danchummanna bunshe, loossanno loosinni anfanni.

¹²Macciishshitanno maccanna la'anno ille, lamenta Kaaliiqi kalaqino.

¹³Goxano bati'rittoro, buxatto; jawaatte loosi'rittoro kayinni duuwatto.

¹⁴Hidhanno manchi hidhannore dinaadanno; hidhe ha'rihu gedensaanni kayinni, ba'raa'rummo yaanno.

¹⁵Hayyo coyi'ranno arrawi, culkunninna duumu dilqinni roore ayirradoho.

¹⁶Egenninokkihura waase ikkanno manchi, imaanasi fushshe aa digattanno.

¹⁷Hanaanqe intoonni sagale coommitanno; ikkollana galle honsanna, afooho bushsha bushsha yitanno.

¹⁸Amaalete gedensaanni hendanni hedo qiniitanno; kunnira ma'littokkinni gaadoho fultooti.

¹⁹Hemaanchu fojo dimaaxannona, coye daddalannoha gamba assidhooti.

²⁰Annasi woy amasi xonannohu, barri-male tunsichu giddora eanno.

²¹Muddamme gamba assinoonni jiro, geedote maasso di"ikkitanno.

²²«Rabba qo'lummokkinni diagureemmo» yitooti; kaa'lannohena, Kaaliiqa addaxxi.

²³Kaaliiqi hanaaqu keenaasinchonna, taalinokki safaraasincho giwanno.

²⁴Mannu ha'ranno doogo kulannohu Kaaliiqaati; hatto ikkina, ha'ranno doogo mannu umisinni hiitto ikke afannoyya?

²⁵Mannu muddame Kaaliiqira xano xa'ne, galagale gaabbiro, woshshaado ikkitanno.

²⁶Egennaamu moote bushuulle meemmiisse fushshanno; insano mararikkinni qorichishanno.

²⁷Giddoyidi hedo Kaaliiqi caabbichooti; wodanankeno fonqolte la'anno.

²⁸Moote gashshootu aana keeshshannohu, halaalenna danchumma loosirooti.

²⁹Wedellaho ayirrinyinsa wolqansaati; geerraho gaamaarrensa awuuwensaati.

³⁰Hamuruurrissanno gana bunshe huntanno; haxuulano giddoyidi mannimma xalashshitanno.