Read Sidama_Qullaawa _Maxaafa LAWISHSHA 21 Bible Online

LAWISHSHA 21 - Sidama_Qullaawa _Maxaafa bible

LAWISHSHA 21

¹Mootete wodani Kaaliiqi anga no; isino lolahanno wayi gede hasi'riwa haa're ha'rannosi.

²Mannaho ha'ranno doogo baala garalla labbanno; Kaaliiqi kayinni wodanu mu'ra la"anno.

³Kaaliiqi kakkalotenni roore, keeraanchimmanna halaale loosa baxanno.

⁴Boonaleessaho, boollaqi'rannohuranna bushaho caabbichinsa cubboho.

⁵Jawaatu manchi hedo jirotenni xaadissanno; muddamaanchu kayinni buximate uwanno.

⁶Awaawurre gamba assinanni jiro, fooraru gedeetenna reyote woshshaadooti.

⁷Dancha coye assa baxxannokki daafira, busha manna assino barshi co'o asse hunanno.

⁸Sao loosannohu doogo shokkashshote; keeraanchunniti kayinni suwashshote.

⁹Afoo busha galte ledo mitto mine galantenni, gobba hee'ra woyyate.

¹⁰Bushuullu bunshe halchitanno; ayerano mararro diafidhino.

¹¹Boonaleessu qoricha adhanno yannara, hawanyu egenno afi'ranno; busuluno kullisiro egenno lexxanno.

¹²Keeraanchu Magani, cubbaataamu mini giddo ikkannore seekke la"anno; bushuulleno ba'anno gede assanno.

¹³Buxichu raarera umo duwe giwannoha, qarrame raareenna kaa'lannosihu dihee'ranno.

¹⁴Maanxe uyinanni afanshi hanqo qiissanno; kikki'late amande uyinoonnirichi, aara gabbi assanno.

¹⁵Keeraano halaalu fulanno woyite hagiidhitanno; bunshe assitannori kayinni massanno.

¹⁶Egennote doogo so'rinoha, reyo agarte noosi.

¹⁷Techo qawaaxxo hasi'rannohu buxanno; woyinete xajjenna buuro baxannohu dureessa di"ikkanno.

¹⁸Bushuullu danchu mannira abbitino qarri, wirri yee umonsa amadanno.

¹⁹Afoo bushanna hanqaaleette galte ledo hee'rantenni, molo baattora hee'ra woyyate.

²⁰Egennaamu manchi mine jironna danchu uduunni hee'ranno; gowwu kayinni nooha baala billaallise gudanno.

²¹Keeraanchimmanna shaqqille baxanno manchi seeda diro hee'ranno; wolu mannino ayirrisannosi.

²²Egennaamu manchi wolqaataammu katama qeele angara qo'lanno; hexxitino qiishono diiganno.

²³Afoosinna arrawosi agadhannohu, lubbosi qarrunni gatisi'ranno.

²⁴Boonaleessunna naaxxaleessu manna arrassanno; boollaqi'ranni isonoo leellishanno.

²⁵Cee'maleessu looso baxannokki daafira, halcho calla shitannosi.

²⁶Cee'maleessu barra wo'ma yoranni hosanno; keeraanchu kayinni honqooqoo'mikkinni aanno.

²⁷Cubbaataammu kakkalo battete; busha hedonni heedhe shiqishshanno woyite roore giwissanno.

²⁸Afinokkire farci'rannohu ba"anno; halaale coyi'rannohu kayinni kaajje hee'ranno.

²⁹Bushu manchi assinore morome higa giwanno; halaalaanchu kayinni baalanka coye wodaninni assanno.

³⁰Mannu egenno, wodanchanna hedo, Kaaliiqi yiinore ittissara didandiitanno.

³¹Farado olaho qixxeessinanni; qeelle aannohu kayinni Kaaliiqaati.