Read Sidama_Qullaawa _Maxaafa LAWISHSHA 31 Bible Online

LAWISHSHA 31 - Sidama_Qullaawa _Maxaafa bible

LAWISHSHA 31

¹Kunninni aante nooti, Maasa mootera Limueelira amasi uyitinosi seejjooti:

²Baxeemmahehu beetti'ya, xa'ne afi'roommahehu, hanni atera maricho kulohe?

³Mootoolla gudinoreetina, wolqakki meentu aana guxxitooti.

⁴Limueeli'ya, macciishshie! Mootoolla woyinete xajje aga dihasiissannonsa; woy dimbissanno agattora hagaaga dihasiissannonsa.

⁵Aggannoha ikkiro seera habbanno; buxanete yoono shokkishshanno.

⁶Dimbissanno agatto reyitanni nooriranna, heeshsho tunsitinoriralla hasiissanno.

⁷Agguro, buximansanna shettonsa habbanno.

⁸Coyidhe affannokkirira afoo ikkinsa; kaa'lannoha hoogginorira halaale fushshinsa.

⁹Insa daafira coyi'raminsa; buxanetenna gadadaammaho halaale fushshinsa.

¹⁰Maanaame galte ayi afi'rannose? Ise ilkunni roore muxxete.

¹¹Ayiddaannise seekke hexxannose; isirano xeannosiri dihee'ranno.

¹²Lubbotenni noo geeshsha danchare assitannosita ikkinnina, isira bushare diassitanno.

¹³Ge'reewu ordanninna dancha shalonni, hisattino anganni uddano gantanno.

¹⁴Ise daddalu markaawe gede, xeerto gobbanni sagale gamba assitanno.

¹⁵Soodikkinni gutte ka'e, minise mannira sagale qixxeessitanno; soqqamaanoserano looso beekkanno.

¹⁶Loosi'nanni gobba umise la'e hidhitanno; afidhino woxinni kaashsho hirte kaassanno.

¹⁷Hallose kaajjishshe qodhite, looso jawaatte loossanno.

¹⁸Assitannori baalu ledinoronna hooginoro buuxxanno; hashsha minese caabbichu dixoanno.

¹⁹Uddano angasenni suqqite gantanno.

²⁰Buxanetenna qarraataammaho, anga hiixattanno.

²¹Minise mannira iibbitanno uddano noonsa daafira, qorru yannara nafa diyaaddanno.

²²Ma'nate aana karrannire angasenni seekkitanno; iseno duume haarrenni gannoonniha xuma imaana uddidhanno.

²³Ayiddaannise gobbate geerri ledo, songanno yannara ayirrinsanniho.

²⁴Uddanonna hiito angasenni gante, daddalaasinete hirtanno.

²⁵Jawaatatenna ayirradote; albillittete daafirano diyaaddanno.

²⁶Afiisenni egenno fultanno; manna shaqqillunni seejjitanno.

²⁷Minese seekkite towattanno; loossukkinni ofolte di"ittanno.

²⁸Oosose gotti yite ka'e, naaddannose; ayiddaanniseno,

²⁹«Danchare assinohu lowo meenti no; ati kayinni wo'manka roorete» yaanni jajannose.

³⁰Xumme kaphoho; biinfilluno ba"anno; Kaaliiqa waajjitanno mancho kayinni galatantinote.

³¹Loossino loosi daafira ayirrissese; mannu albaannino naaddese.