Read Sidama_Qullaawa _Maxaafa LAWISHSHA 5 Bible Online

LAWISHSHA 5 - Sidama_Qullaawa _Maxaafa bible

LAWISHSHA 5

¹«Beetto'ya ballo, Egenno'ya macciishshi; wodancha'yano seekkite buuxi.

²Hatto assittoro, hayyicha ikkatto; coyi'ratto coyino egennaamo ikkoottota leellishanno.

³Foortanno mancho coyidhanno coyi malawoho; hasaawiseno buuroho.

⁴Gedensaanni kayinni ise argiisimma qaraartanno; gamaxantino bise gede murtanno.

⁵Hoodesi ha'rittoro, jeennaatu widira qolte haadhe hadhannohe; ise hadhanno doogo reyonnite.

⁶Heeshshote doogo ba'inoseta affukkinni sammi yite raataabbanno.

⁷«Xaano beetto'ya ballo, yeemmore macciishshi; kuleemmoheriwiinni wirri yitooti.

⁸Hattoo manchowiinni xooqi; nafaraseenni higge nafa sa'ooti.

⁹Hakka marittoro ayirrinyekki hoogatto; anjenni heedheenna mararannokki manni amade shaannohe.

¹⁰Jirokki allaggichu adhanno; daafurikki woleho ikkanno.

¹¹Heeshshokki goofimarchira maalikkinna bisikki itame goofeenna wi'litanni,

¹²‹Hanni seejjo mayira giwummo! Wodani'ya higa mayira giwi!

¹³Rosiisaano'ya yitinore dimacciishshoommo; kultinoereno diadhoommo.

¹⁴Kunni daafira, songote alba shollate shiimurilla gatinoe› yaatto.

¹⁵«Waa umikki buichonni agattonte gede, galtekki callate ammanamoottoha ikki.

¹⁶Buichokki mullawa xawoho du'nante, wayikki gudumaaleho lolahe kaa'lannoheri nooni?

¹⁷Buichokki ate callikkita ikkito; allaggichu gutamoonkehe.

¹⁸«Galtekkinni tashshi yoohe; qeedhichimmakki galte ledo hagiidhi.

¹⁹Ise bulaate gedee xumaati; biifado guru'micho gedeete; unuunnase tashshi assitohe; wo'manka woyite baxillise goshooshohe.

²⁰Beetto'ya ballo, foora manchora mayira dimbatto? Wolu galte mayira hanqafatto?

²¹Kaaliiqi mannu assannore baala afanno; marranniwa baala la"anno.

²²Busha mancho assino cubbi amadannosi; umisi cubbi woshshaado ikkannosi.

²³Seejjama giwasinni reyanno; lowo geeshsha gowwa ikkasinni kainohunni waamma eanno.