Read Sidama_Qullaawa _Maxaafa LAWISHSHA 7 Bible Online

LAWISHSHA 7 - Sidama_Qullaawa _Maxaafa bible

LAWISHSHA 7

¹«Beetto'ya ballo, yoommohere seekkite agadhi; hajajo'yano wodanikkira wodhi.

²Lubbotenni hee'ratto gede hajajo'ya baala agadhi; rosiiseemmohereno illekki diikkichi gede assite towaxxi.

³Qubbekkira usudhi; wodanikki giddono borreessi'ri.

⁴Egenno, ‹Ati rodoo'yaati›; wodanchano, ‹Ati jaala'yaati› yii.

⁵Insa wolu galtewiinni fafatto gede assitannohe; suumetenni dogganno mancho fooratewiinni agartannohe.

⁶«Mitto barra mini'ya masikoote giddoonni gobbara qole laeemmo woyite,

⁷wodana dartinokkire lowo wedella afoommo. Insa giddo mittu lowo geeshsha gowwu wedellichi no.

⁸Hakku wedellichi, mitte mancho mini muleenni hige minise maddera noo doogo amade sai.

⁹Hatti yannano arrishsho e'eenna, leeshshi yiino woyiteeti.

¹⁰Hakkunni gedensaanni hatti mancho isinni xaaddara fultu. Imaaniseno foora mancho ikkase leellishannoho; manna so'risiissanno hedo noose.

¹¹Ise bashshi assitannokkitenna saaliweelo manchooti; mine ofolla baxxannokki daafira, wo'ma woyite kawanna ka'a doyitanno.

¹²Manna woshshaadate mito woyite doogo, mito woyite gudumaaleho, madde baalate uurrite agartanno.

¹³Hakkonne wedellicha hanqaffe sunqitusi; kechi yite la'anni,

¹⁴‹Ani techo kakkalo shiqishi'roomma; kakkalote aaninnino maala gatisi'roomma.

¹⁵Xa kune atenni xaadate fuloomma; lowo geeshsha hasi'roommaha afi'roommahe.

¹⁶Daallasi'yara Gibitsetenni dagginota biifado uddano karoomma.

¹⁷Aanaho kaarbetenni, almuuninna qarafa yinanni haqqenni seekkinoonni su'nare giggishshoomma.

¹⁸Amo sooda geeshsha baxillunni kassi yinona; baxillunni mimmitonke hagiirsiinsona.

¹⁹Ayiddaanni'ya mine dino; fafo gobba ha'rino.

²⁰Lowo woxe adhe ha'rino daafira, 2 lamala geeshsha keeshshanno› yitusi.

²¹Kunni garinni coommadu arrawisenni qalbesi moortu; shaqqadu hasaawisenni doggusi.

²²Gorrinara haa'ne ha'nanni bootinna, wodanasi maxxu qasannota afikkinni woshshaado eara qoqqobbisanno gaarraanchi gede, qoleno buubbe woshshaado e'anno ceicho gede, sammi yee hoodese ha'ri. Tenne giddoonni kayinni lubbosi ba'ara noota diafino.

²⁴«Beetto'ya ballo xaano macciishshi; yeemmohere seekkite wodanchi.

²⁵Wodanakki tenne mancho doogo widira qoltooti; doogote aaninni wirri yite hoodesi hadhooti.

²⁶Ise lowo manna huntino; kiiro afi'rinokki manna guddino.

²⁷Minise jeennaate massitanno doogo aana no; minisera massitanno doogo reyote furdiggi assitanno» yiino.