Read Sidama_Qullaawa _Maxaafa ROSIISAANCHO 12 Bible Online

ROSIISAANCHO 12 - Sidama_Qullaawa _Maxaafa bible

ROSIISAANCHO 12

¹Bushu barri dayikkinni, «Tashshi diyiinoe» yaatto diri iillikkinni anjekki yannanni Kalaqaanchokki qaagi.

²Hatte yannara arrishsho, aganunna beeddahe tunsitanno; gomichuno xeenu gedensaanni galagale higanno.

³Hexxinanni cigile qece yitanno; jawaata lekka daafurtanno; hinko kiiro xe'e sagale corqa hoogganno; ille jaaroorte la"a gibbanno.

⁴Macca doogonniha, daammunnihanna muuziiqu luulo macciishsha gibbanno. Kayinnilla, ceate qaale macciishshine baqqi yinanni.

⁵Gooddo fula waajjishshanno; lekkatenni ha'ra qarra ikkitanno. Umu awuuwanno; meessi wolqanni qaafa didandiinanni; halcho baala ba'anno. Hatte yannara mannu hegere minisira ha'ranno; wi'laanu doogote wi'lishshanno.

⁶Birru cagaage ta'eenna, culkunni seekkinoonnihu caabbicho worranni uduunnichi hiiqqamikkinni Magano qaagi; waa goshoonshanni siiwo giddo ta'anno; wayi gambayichino gamaho hiiqqamanno.

⁷Maalu bushsha ikkinohura, galagale bushsha higanno; lubbo kalaqinose Maganiwa hadhanno.

⁸Rosiisaanchu, «Haafaho! Haafaho! Baalunkuri haafaho!» yii.

⁹Hayyichu rosiisaanchi egennaamo ikkinohura mannaho egenno rosiisino. Isino maammaashsha xiinxallihu gedensaanni, aante aantetenni qixxeesse worino.

¹⁰Seyino coye afi'rate xiinxallino. Halaalaancho yoo ammanamatenni borreessino.

¹¹Egennaammu qaali, saada allaallanni siqqo qaraamete gedeeho; xaadinsoonni maammaashshi gobbe amaddanno misimaarra gedeeho. Kuri aamaminohuno, mittu allaalaasinchi Maganuwiinniiti.

¹²Beetto'ya, quwa sa"attokki gede qorophi; maxaaffa borreessine digundanni; xiinxallate batinyi daafursanno.

¹³Coyi baalunku gumulo kuneetina, macciishshino. Kuni mannu wo'munkura hasiisinohona, Magano ayirrisi; hajajosino agadhi.

¹⁴Maganu baalanka coye, maaxaminohano ikkiro mannu looso baala, danchano bushano yoote shiqishanno.