Read Sidama_Qullaawa _Maxaafa ROSIISAANCHO 3 Bible Online

ROSIISAANCHO 3 - Sidama_Qullaawa _Maxaafa bible

ROSIISAANCHO 3

¹Kalqete aana ikkannori baalunku yanna afi'rino.

²Ilamate yanna no; reyate yanna no. Kaasate yanna no; buqqisate yanna no.

³Shaate yanna no; gatisate yanna no. Diigate yanna no; minate yanna no.

⁴Dadillate yanna no; hagiidhate yanna no. Wi'late yanna no; sirbate yanna no.

⁵Kinna billaallisate yanna no; kinna gamba assateno yanna no.[1] Baxillunni hanqafamate yanna no; babbaxxateno yanna no.

⁶Hanse afi'rate yanna no; afi'noonniha hoogateno yanna no. Gamba asse worate yanna no; billaallise hunateno yanna no.

⁷Darate yanna no; gowate yanna no. Sammi yaate yanna no; hasaawate yanna no.

⁸Baxate yanna no; giwate yanna no. Olaho yanna no; keereho yanna no.

⁹Loosi'rannohu daafurisinni maricho lexxanno?

¹⁰Mannu daafuranno gede Maganu duhisiisinoha loosu duha laoommo.

¹¹Maganu wo'mankare yannasinni biifise loosino. Mannu wodanira hegerimmate hedo worino. Ikkollana Maganu kaimunni gawalote geeshsha loosannore afate mannaho egenno diuyino.

¹²Kunnira, mannaho lubbotenni hee're dancha looso loosate ka'aanni hagiirsiisannosiri nookkita afoommo.

¹³Qoleno mannu baalu itanninna aganni daafurisinni hagiidhanno. Tinino Maganuwiinni afi'rino eltooti.

¹⁴Maganu loosinori baalu hegereha ikkinota afoommo; lendannirinna xeinsanniri dino. Konne assinohuno mannu ayirrisannosi gedeeti.

¹⁵Xa noohu baalu albanni nooho; ikkara noohuno albanni ikke nooho. Maganu alba loosinonkalla haaro assanno.

¹⁶Kalqete aana halaalaancho yoo darga cubbu, halaalu darga beebba amadde noota afoommo.

¹⁷Anino wodani'yanni, «Wo'munkuri baxxannoti yanna noo daafira, Maganu cubbaataamono halaalaanchono yoonniwa abbanno» yee hedoommo.

¹⁸Qoleno, «Mannu saadate gedeeha ikkinota afanno gede, Maganu fonqolanni noosi» yee hedoommo.

¹⁹Mannunnitinna saadanniti kaayyonsa mittete; taalote; baalunku reyitannoreeti; baalunkura mittu gari fooli noonsa; mannu saadatenni diwoyyanno; baalunku mullareeti.

²⁰Mannuno saadano mittu dargira hadhanno; lamunku bushshunni kalaqantinohura galagalte bushsha higganno.

²¹Mannu lubbo iimira hadhannotanna saadate lubbo qolte baatto e'annota afinohu ayeti?

²²Mannunniti kaayyosi tenne ikkitinohura, loosisinni hagiidhate gobbaanni woliri noosikkita afoommo. Reyihu gedensaanni ikkannore la"anno gede assannosihu ayeti?