Read Sidama_Qullaawa _Maxaafa ROSIISAANCHO 7 Bible Online

ROSIISAANCHO 7 - Sidama_Qullaawa _Maxaafa bible

ROSIISAANCHO 7

¹Dancha shittonni danchu su'mi rooranno; ilamate barrinni reyote barri woyyanno.

²Lubbotenni noohu duuchunku reyannoha ikkinota qaaganno gede, jilu minira ha'rantenni wi'late minira ha'ra woyyate.

³Albu koffi yiiro nafa, wodana xawisanno daafira oso'lantenni dadilla woyyate.

⁴Egennaammu wodani wi'late mine no; gowwootu wodani kayinni jilu mine no.

⁵Gowwootu guwishshinni egennaammu rufa woyyate.

⁶Gowwu osoli giirate giddo xoxanno uti gedeeho; kunino haafaho.

⁷Beebba loosa egennaamo mancho gowwissanno; gubbo ita wodana huntanno.

⁸Baalunkurira hanafontenni gumulo woyyate; boonaleessunkunni cincaaleessu woyyate.

⁹ Koma amada gowwimma ikkitino daafira, ati hanqoho muddantooti.

¹⁰«Xaahunni roore albi diri hiittoo danchaati?» yitooti. Egennaamu togoo coye dicoyi'ranno.

¹¹Kalqete aana noo manni baalunku egenno afi'ra hasiissannosi; egenno afi'ra iqqa afi'rate gedeeti.

¹²Egenno woxu gedee caaleeti. Egenno kayinni egennaammu lubbo gargaratenni roortanno.

¹³Hanni Maganu assinore hedi! Isi shokkishinoha ayi suwisanno?

¹⁴Baalunkuri qinaannohe yannara hagiidhi. Qarru daannohe yannara kayinni, Maganu hagiirreno dadilleno soyannota habbooti. Albillitte ikkannoreno afinohu dino.

¹⁵Kunni haafu diri'yanni, lowo coye afoommo. Keeraanchu keeraanchimmasinni hee're rahe reyanna, bushu kayinni bunshesinni hee're seeda diro hee'ranna laoommo.

¹⁶Umokki hu'nattona, lowo geeshsha keeraancho ikkitooti; lowo geeshshano egennaamo ikkitooti.

¹⁷Yanni-male reyattona, lowo geeshsha busha ikkitooti; gowwano ikkitooti.

¹⁸Magano waajjannohu wo'mankare qeele sa"anno daafira, bunshetennino ikko danchummatenni quwa sa'ooti.

¹⁹Mittu katamira heedhannorinni tonne gashshaasinenni roore, mitto mancho egennosi wolqaataamo assitannosi.

²⁰Mitte so'rono assikkinni, wo'manka woyite dancha looso calla loosannohu baattote aana mittuno dino.

²¹Mannu coyi'rannore baala guungeessitooti; wo'manka coye macca worte macciishshattoha ikkiro kayinni, soqqamaanchikki xonannahe macciishshatto.

²²Atino batinye higge woloota xonoottota wodanikki afino.

²³Konne baala egenno'yanni fonqole la"ate wo'naaloommo; lowo geeshsha egennaamo ikkate mixi'roommo. Ikkollana, wolqa'yara aleenni ikkinoe.

²⁴Iillate dandiinannikkita lowo geeshsha diime ikkitino daafira, heeshsho maa ikkitinoro buuxe afate ayino didandaanno.

²⁵Ani kayinni, egennonna coyi baalu ikkito buuxe afate diinaggaawoommo. Bunshe gowwimma ikkitinotanna gowwimmano macharaarre ikkitinota afate mixi'roommo.

²⁶Reyote aleenni qaraarannoha mitto coye afoommo. Kunino, baxillisenni woshshaadde, shibote gede halloho marmarantanno manchooti. Magano waajjannohu isewiinni gatanno; cubbaataamu kayinni amadamanno.

²⁷Rosiisaanchu, «Dawaro afi'rate hasi'ranni shiimu shiimunni gumulo iilloommo coyi kuneeti» yaanno.

²⁸Xaa geeshsha hase afoommokkiri no. Kumu labballi giddonni mitto afoommo; baalunku meenti giddonni kayinni mitte nafa hoogoommo.

²⁹Maganu manna suwise kalaqinota calla afoommo. Mannu kayinni, lowo geeshsha shokkashshoho.