Read Sidama_Qullaawa _Maxaafa FAARSO ROORE FAARSO 1 Bible Online

FAARSO ROORE FAARSO 1 - Sidama_Qullaawa _Maxaafa bible

FAARSO ROORE FAARSO 1

¹Faarso wo'manta roortannoti Selemooni faarso tenneeti.

²Baxillikki woyinete xajjenni roore coommannoha ikkino daafira, suumekkinni sunqie.

³Buudhatto shitto tanni yite su'niitanno; su'mikkino[1] shitto baalantenni roore su'naannoho. Seennu baxannohehuno kunniraati.

⁴Anga'ya amadde goshooshie; mitteenni dondo! Moote'ya holgikkira eessie; hakko mitteenni hagiidhineemmo. Baxillekki woyinete xajjenni roore naandeemmo; kunnira, seennu baalu lowo geeshsha baxannohe.

⁵Ki'ne Yerusaalamete seenni macciishshe! Ani kolishshote; ikkollana kayinni xumate. Ane kolishshimma Qeedaari dukkana labbanno; xumme'ya Selemooni gashshooti mini dukko gedeete.

⁶Dana'ya kolishshiishshinoti arrishshotena, kolishshimma'ya daafira arrassitinoonte"e. Ama'ya ooso roduuwi'ya, ane ledo giwantino daafira, woyinete kaashshi agaraancho assitinoe; kunnira umo'ya agadhate yanna diafi'roomma.

⁷Baxillaancho'ya, hanni ge'reewokki hosiisi'rattohu mamaatiro kulie! Barru taalootira caa'lanno gede assattohu hiikkooti? Ate hasi'ranni, alba diphitino mancho gede ikke mayira raataaweemma?

⁸Ati seennu baalunkunni roore xuma, darga afoottakkiha ikkiro, ge'reewu ha'ruma la'anni ha'ri. Meu wilii'lekki, allaalaasinete dukkanna mule allaa'li.

⁹Baxillaancho'ya, Feriooni faradi gaare giddo noota, xuma ganya lawatta.

¹⁰Kiccakki maccate butichinni biiffinote; goowikkino irrunni gaamaarinoho.

¹¹ Ninke lende birru shura afi'rinoha, culku irra seekkisiinseemmohe.

¹²Moote haranchu daallasi aana gaffi asse hee'reenna, shitto'ya su'niilli mine wo'mi.

¹³Baxillaanchi'ya, guntuti'ya qarrira noohu, gujuujjete su'nari gedeeho.

¹⁴Baxillaanchi'ya, Ayini-Gaadi woyinete kaashshi darga, fulino arfaasi gedeeho.

¹⁵Baxillaancho'ya, ati xumate! Hiitto biifoottate! Illekki luulakkote.

¹⁶Baxillaancho'ya ati xumaho. Addintanni banxanniho; daallasinke shaqqado hayissooti.

¹⁷Mininke tuuqqa daguwunnite; qalchuno hoommetenni gannoonniho.