Read Sidama_Qullaawa _Maxaafa FAARSO ROORE FAARSO 2 Bible Online

FAARSO ROORE FAARSO 2 - Sidama_Qullaawa _Maxaafa bible

FAARSO ROORE FAARSO 2

¹Ani Saarooni adalchinna, lagichaho fulanno daraarchi gedeetella.

²Baxillaancho'ya meentu giddo, utu mereero fulino arfaasi gedeete.

³Baxillaanchi'ya wolu wedelli ledo taashshiniro, dubbu giddo laalanno haqqichi gedeeho; anino hagiidhanni caalisi hunda fooliishshi'roomma; laalosino coommitannote.

⁴Jilu minira haa're massie; baxillisi anera baandira ikkie.

⁵Baxillu amadeenna xiwamoommana, woyinete leo itissine jawaachishshe"e; laalo uyitine hagiirsiisse"e.

⁶Guracho angasi barkisannoe; qiniitichotenni hanqafannoe.

⁷Ki'ne Yerusaalamete seenne! baxillu umisi hasi'ra geeshsha, kayissinannikki gedenna baqqi assitinannikki gede, gaarraanchunna bulaate su'minni eegameemma'ne.

⁸Kuneeti baxillaanchi'ya huuro, ilaallate aana kubbitanni daggu; isino gaarrate aana dodanni dayi.

⁹Baxillaanchi'ya geedimo, woy aja gaarraancho lawanno. Kuneeti mininke gaatara uurranno; masikootete widoonni qole la"anno; dukkote widoonni qole illaallisanno.

¹⁰Baxillaanch'ya, «Baxillaaancho'ya kai! Xuma'ya ballo amo mitteenni ha'nona!

¹¹Kune xeenu birrino; hawaduno saino.

¹²Baattote aana daraaro leeltino; faarsote yanna iillitino; gobbankera lembooli huuro leeltanni no.

¹³Balase laala hanaffino; woyinete daraaro su'niilli baatto wo'mino; kunnira baxillaancho'ya kai; ane xuma, mitteenni ha'nona amo!

¹⁴Ati boonu qarra maaxantino lemboolcho gedeeti; albikki xumahona, mitte hige laoyya! Huurokki baxissannotena, mitte hige macciishshoyya!» yaannoe.

¹⁵Woyinenke daraartinona, woyinenke huntannokki gede, yeedaala, shiimmaadda yeedaala amaddenke.

¹⁶Baxillaanchi'ya aneho; anino isite; daraarote mereero hoshshasi allaa'lanno.

¹⁷Hashshi tunsichi ho'la geeshsha, soodo bubbe bubbissa geeshsha, baxillaancho'ya ballo, geedimu woy aju gaarraanchi gede, boonnaame ilaalla aanaanni doddanni higi.