Read Sidama_Qullaawa _Maxaafa FAARSO ROORE FAARSO 4 Bible Online

FAARSO ROORE FAARSO 4 - Sidama_Qullaawa _Maxaafa bible

FAARSO ROORE FAARSO 4

¹Baxillaancho'ya, ati hiittoo xumaati! Hiitto biifootta! Guggu'laanchikki giddoonni la'niro, illekki luulakkote. Umikki dananchi, Geleaadi Ilaalinni dirrannoha, koliddaanna me"e lawanno.

²Hinkokki giddonsa mitte maseena heedhukkinni, lakkuwa qalannohu, ordansa hanxe hayishshinoonnihu, waajjuullu ge'reewi gede baxissannote.

³Suummakki gujuujjete gede biiffinote; hasaawatta woyiteno lowo geeshsha baxissanno; lamenti kiccakki guggu'laanchikki giddoonni la'niro, lamewa balka yitinota roomaanete laalo labbanno.

⁴Goowikki, Daawiti shae gedee seedaati; goowikki irrino, Daawiti shae aana suntoonnita kume wonquwanna, olu bagado lawanno.

⁵Lamunku guntutikki, lakko qalame, dubbu daraaro giddo hosannoha bulaate wilii'le lawanno.

⁶Hashshinohu sooda geeshsha, tunsichuno sa"a geeshsha, kaarbete ilaaliwa, hixaanu gaariwa mare fooliishshi'reemmo.

⁷Baxillaancho'ya, manninatikki xumaho; kullannireno diafi'rootta.

⁸Idayicho'ya, amo ane ledo Libaanoosi Ilaalinni dirri; Libaanoosi Ilaalinni amo; Amaana Ilaali guunxonni dirri; doobbichunna dagunchu hee'rannowiinni, Seniirinna Hermooni ilaallanni dirrite amo.

⁹Ayirrado rodoo'ya, idayicho'ya, la"atta garinna goowikki irri wodana'ya moorino.

¹⁰Ayirrado rodoo'ya, idayicho'ya, baxillikki hiitto hagiirsiisannoho! Baxillikki woyinete xajjenni roore tashshi assanno; su'niillikkino shitto baalanta rooranno.

¹¹Baxillaancho'ya, suummakkinni malawu leo lolakkanno; arrawikkinnino malawunna ado burqitanno; uddanokki foolino, Libaanoosi dubbi fooli gedeeho.

¹²Ayirrado rodoo'ya, idayicho'ya, ati, kinchu huxxinni qoqqomboonni gati gedeete; wolu eannokki gede cunfe agurroonni buicho lawatta.

¹³Ati, doorroonniti roomaanete laalo, ha'nashshunna naardoosi shitto noo gate lawatta.

¹⁴Naardoosi, su'niitanno irde hixichi, duuwanchu, hixaanu gede su'naannohu addi addi haqqi noose. Qolteno giddose kaarbe, daraaranno argiisinna, su'niitannoti addi addi haqqe fultanno.

¹⁵Ati gate lolakkanno buichootinna, xoannokki waati; Libaanoosi ilaalla hundinni, burqanno xashshi gedeete.

¹⁶Ati aliyye bubbe kai! Ati wodiidi bubbeno kawa amo. Dagge haqqe'ya giddo bubbisi; diilallono, danchu fooli giddo wo'minota ikkito. Baxillaachi'ya haqqe giddora dayona; doorroonni laalono itona.