Read Sidama_Qullaawa _Maxaafa FAARSO ROORE FAARSO 7 Bible Online

FAARSO ROORE FAARSO 7 - Sidama_Qullaawa _Maxaafa bible

FAARSO ROORE FAARSO 7

¹Mootete ila lawattati, lekkakki fano koatte giddoonni la'niro, hiitto biiffinote! Giwoodikki qaru ogeessi seekkinoha, dilqu irra lawanno.

²Mudukkikki qadhitinota woyinete xajje wonshinoonni birille lawanno; hallikki, daraaro gaangeessine usurroonnita, qamadete nadala lawanno.

³Lamunku guntutikki, lakko qalaminore bulaate wilii'le lawanno.

⁴Goowikki, ilkunni seesiinsoonni shae lawanno; illuwakki, lowiidihu Hasebooni Katami, huxxi waalchi mule noo kofamma labbanno. Sanokki, alba Demaasiqo widira higginota, Libaanoosi shae labbanno.

⁵Umikki qoonchi Qermeloosi Ilaali gedeeho; dananchikki shuri mootete haarre lawanno; shurikki xumme mootete wodana moortanno.

⁶Baxillaancho'ya, ati hiitto biifootta! Hiitto xu'mootta! Baxillikki hiitto tashshi assanno!

⁷Uurrinshakki, saattichu haqqa labbanno; guntutikkino saattichu hunduruurro lawanno.

⁸Saattichu haqqicho gidde, laalose hanqifi'ra baxeemmo. Guntutikki woyinete hunduruurro gegeeho; foolikki su'niitanno haqqicho gedeeho.

⁹Afiikki su'niilli, fila woyinete xajje gedeeho. Hatto ikkiro, woyinete xajje, baxillaanchi'ya suumenna, hinko mereero daaddanni dirrito.

¹⁰Ani baxillaanchi'yate; isino ane halchanno.

¹¹Baxillaancho'ya, amo fulle xawo ha'nona; qacha e'ne hakko gallona.

¹²Gunteno woyinete kaashshi giddora ha'no; woyine daraartino gedeenninna, roomaaneno dartino gedeenni la'no. Hakkiicho baxille'ya leellisheemmahe.

¹³ Inkoyete laalo su'niillinna, baxissannoti addi addi laalo qaenkera wo'mite no. Baxillaancho'ya, hatte laalo giddonni, le'inotanna mule xinqinoonnita atera wodhoommahe.