Read Sidama_Qullaawa _Maxaafa ISAYAASI 11 Bible Online

ISAYAASI 11 - Sidama_Qullaawa _Maxaafa bible

ISAYAASI 11

¹Isseyi cifichi ciiranno; rumushshisi giddonni mittichu guma laalanno.

²Kaaliiqi Ayyaani isi aana fooliishshi'ranno; hayyotenna wodanchate Ayyaani, amaaletenna wolqate Ayyaani, egennotenna Kaaliiqa waajjate Ayyaani isi aana hee'ranno.

³Kaaliiqira hajajamano hagiirsiissannosi; illesinni lai garinni calla yoo diyaanno; maccasinni macciishshi garinni calla dicoy'ranno.

⁴Buxanete taashshe coyi'ranno; qarraataammaho halaale fushshanno. Isi hajajonni mannu qorichishamanno. Bunshe loossannore afiisinni fulanno qaali shaanno.

⁵Mannasi taashshatenninna halaalunni gashshanno.

⁶Hiyyeeyye ge'reewu wilii'li ledo galtanno; dagunnano meu wilii'li ledo hossanno; siittunna doobbiyu gurba'ni mitteenni hosanno; shiimu qaaqqi bobbaase allaalanno.

⁷Lalunna moyichu ledo hosanno; siittinsanna qallonsa mitteenni hossanno; doobbiichu handu gede galawa itanno.

⁸Daaimu hamashshu bale mule godo'lanno; qaaqqu buutete balera anga woranno.

⁹Kaaliiqihura Qullaawu Ilaali aana gawajjannori dihee'ranno; wayi baaraho wo'mannonte gede, Kaaliiqa egennino mannino baatto wo'manno.

¹⁰Hakka waro, Isseyi rumushshi gosate malaate ikkanno; gosa baala isiwa tintanno; isi moohanno katami ayirrado ikkanno.

¹¹Hatte yannara, Mootichu galagale angasi diriirse gatino manna Asoorinni, Gibitsetenni, Itiyophiyunni, Elaaminni, Baabilooninni, Hamaatinni, Baaru qaccuwanninna giddichuwa baalatenni gamba assanno.

¹²Hatte yannara, Mootichu Israeelenna Yihudu manna baala billaallinowiinni shoolente maddenni gamba assinota egensiisate malaate uurrisanno.

¹³Hakkunni gedensaanni Israeele Yihuda dihettissanno. Yihuduno Israeelete aana dika"anno.

¹⁴Lamunku xaadde galchimaanni Filisxeeme qassanno; soojjaatoonni noo gosaha jajjansa gudhitanno; Edoominna Moaabi gosa qeeltanno; Amooni gosano insa angara higganno.

¹⁵Kaaliiqi Gibitsete lawo mooshshanno; mannu baalu lekkatenni sa"anno gede Efiraaxisi Waa jawa bubbenni woggare mooshshe 7 shiimmaaddu xashshira soorranno.

¹⁶Akaakkansa Gibitsetenni fultu waro assinte gede, baotenni gattinoti Israeelete taraare Asoorinni fultanno doogo qixxeessanno.