Read Sidama_Qullaawa _Maxaafa ISAYAASI 13 Bible Online

ISAYAASI 13 - Sidama_Qullaawa _Maxaafa bible

ISAYAASI 13

¹Amootsi beetti Isayaasi, Kaaliiqi Baabilooni daafira kulanna macciishshino sokka aante noote:

²Mitturino mu'rannokki ilaali aana heedhine malaate worre! Boonaleeyye Baabilooni gashshaano waalcho higge e'anno gede olantote lallabbine kulle.

³Kaaliiqi, bashshi assitannokki bareedda qullaawa olasi olantanno gede woshshe, hanqissinosire qorichishanno.

⁴Ilaallate aana raare macciishshe! Kuni luulino, mittowa gamba yitino gosahonna gashshootuwaho. Olantote Mootichino olantosi olaho qixxeessanni no.

⁵Insano qaccetenni xeerto gobbanni daggannoreeti; Kaaliiqino gobba baala gudate olantosi qixxeessino.

⁶Kaaliiqi barri iillino; Wo'manka Dandaannohu bao abbaraatina wi'le!

⁷Kunninni kainohunni manna baalaho anga shaqqite waa ikkitanno; baalunku wodani daaqanno.

⁸Iltanno mancho game amaddannohu gede, insano waajjillu goxano ho'lannonsa. Waajjillunni kainohunni baalunku mimmito alba la'anno.

⁹Kuneeti, cubbaataamma baala gude baatto mullicho assannohu, mararannokkihu Kaaliiqi barri, hanqonna aara uddi're daanni no.

¹⁰Mitte mittentinna mittowa tuuddino beeddaheno dixabbanno; arrishshono fultanni heedhenni xo'anno; aganuno dixawanno.

¹¹Kaaliiqi, «Baatto bunshese daafira, bushuulleno cubbinsa daafira qorichisheemmo; boonaleeyye heeshshi asseemmo; kakkachoota shollisheemmo.

¹²Baotenni gatino manni culkunninna filu culkinni roore afi'nannikkiha muxxe ikkanno.

¹³Ani Olantote Mootichi Kaaliiqi aara'ya leellisheemmo barra, gordo shafeemmo. Baattono dargisenni milli yitanno gede asseemmo.

¹⁴Ugaaxe shorritanno bullichi gedenna allaalaanchu nookki ge'reewi gede raataawanni noo manni baalu fiixisiwa higanno; gobbasi widira hige xooqanno.

¹⁵Illete leelliha baala qansanni; qafadaminoha baala bagadunni shinanni.

¹⁶Qaaqquullensa albansaanni doddolle shinanni; minnansa sonqanni; meentonsano shollinshanni.

¹⁷Kuneeti, birrunninna culkunni dogantannokki Medoonoota Baabiloonootu aana kayiseemmo.

¹⁸Wedellansa maxxunninna worbichunni shitanno; qaaqquulleno diagurtanno; shiimmaadda oosono dimarartanno.

¹⁹Gashshoote baalaho qara ikkinoha, mannisi hexxannosiha Baabilooni gashshoote Soddoomunna Gomooru gede asse diigeemmo.

²⁰Hegere hegerera mannu hee'rannokkiwa ikkanno. Arabete mannino hakkiicho dukkana diqasi'ranno; allaalaasineno saada dihosiisidhanno.

²¹Hakkiicho dubbu moyichi: Awulcho mine mi'nitanno; balgudu galanno; geedimu kukkubbanno.

²²Jajjabba minnaranna mootete mini giddo gotu wodanno; yeedaala raartanno. Baabilooni barri muleeti; difafino» yaanno.