Read Sidama_Qullaawa _Maxaafa ISAYAASI 16 Bible Online

ISAYAASI 16 - Sidama_Qullaawa _Maxaafa bible

ISAYAASI 16

¹Ki'ne Moaabi manna! Tsiyooni Ilaalira noohura Yerusaalamete gashshaanchira Seelai Kataminni halallitte gobba widoonni qoltine ge'rechu goco afansha assitine sokke.

²Arnooni Waa fulannohu Moaabi meenti minisenni fulte raataabbanno cea gedeeho.

³Moaabi sokkaano Yihudu mannira, «Hanni assineemmore kullenke; barru taalootira caali'ne hashshi tunsichi gede ikke golonke.

⁴Darame dayinohu manninke ki'ne ledo hee'ro; huntara hasidhannoriwiinni goltine gatissenke» yitanno. (Mararannokki diini ba"anno; kunni ka'a digawajjanno; gobbano dihunanno.

⁵Hatte yannara mittu gashshooti hegere baxillinni uurranno. Daawiti sirchinni mittu ammanaminohu moohanno. Isi rahe halaale hasannohonna taashshe gashshanno mooteeti.)

⁶Yihudu manni, «Moaabi manni naaxxaleeyye, boonaleeyyenna boollaqidhannore ikkitinota anfoommo; ikkollana mulla haafalla boo'nitanno» yaanno.

⁷Kunnira, Moaabi manni wi'lo; Moaabi daafira mannu baalu wi'lo. Qiirihereesi Katamita dancha sagale wolsitanno woyite baalunku hururante wi'litanno.

⁸Haseboonihu loosi'nannihunna Sibimahu woyinete kaashshi dargi diigamino. Kuni woyinete kaashshi dargi dagate gashshaano aggannota dimbissannota woyinete xajje qixxeessinanniwaati. Hakkunnira albaanni hattennehu woyinete xajje kaashshi Yaizeeri Katami geeshsha hala'linoho. Qoleno galchimaanni Reyino Baarira widoonninna soojjaatoonni halalli geeshsha iillanno.

⁹Kunnira, Yaizeerira wi'leemmonte gede, Sibimahura woyinete kaashshira wi'leemmo. Hasebooninna Eliaale daafira hindiiddo'ya lolakkanno. Gide gamba assi'rate ayyaanano diayirrinsanni.

¹⁰Woyinete kaashshi giddo hagiidhannohu mittuno dihee'ranno; ililleettenna faarso dimacciishshinanni. Angannita woyinete xajje huuncannohu dihee'ranno; hagiirru ililleetteno diheedhanno.

¹¹Kunnira, Moaabiranna Qiirihereesira hururame wi'leemmo.

¹²Moaabi manni magannansa mininna magansidhanno dargi noo ilaalla hodhanni daafurino; ikkollana tini ikkito leddinonsari dino.

¹³Kaaliiqi balaxe Moaabi daafira coyi'rino coyi hakkonneeti.

¹⁴Xa kayinni Kaaliiqi, «Kiranyunnihu loosu barri goofannohu gede Moaabi ayirrinyinna lowohu mannisi 3 diri giddo shollanno; shiimu manni callu gatanno. Gatino mannino wolqa afi'rinokkiha ikkanno» yii.