Read Sidama_Qullaawa _Maxaafa ISAYAASI 19 Bible Online

ISAYAASI 19 - Sidama_Qullaawa _Maxaafa bible

ISAYAASI 19

¹Gibitsete daafira kulloonni sokka kunninni aante noote: Kaaliiqi ariiffatu gomichi aana ofolle Gibitse daanno. Gibitsenniti kaphu maganna albasiinni qece yite huxidhanno; Gibitsete manni wodanino daaqanno.

²Kaaliiqi, «Gibitsoota mimmitu aana kayiseemmo. Roduu rodoo, jaalu jaala, katamu katama, gashshaano gashshaano qassanno gede asseemmo.

³Gibitsootu hexxo mudhitanno; hedonsano mullare asse agureemmo. Hatte yannara, kaa'litannonsa gede magannansa xa'midhanno. Kiiloho hadhanno; ekerrate ledo ma'litanno.

⁴Gibitsoota mararannokkihura kaajjadu mootera sayise eemmo. Konne coye coyi'roommohu ani Olantote Mootichi Kaaliiqaati» yaanno.

⁵Abbayi Wayi ajanno; suutu suutunni moolanno.

⁶Gorsuwa bobbanno; Gibitsete baattora wayi dihee'ranno; hanxonna haqaluno moolanno.

⁷Abbayi gama noo jajji baalu qooranno. Wayi gama winxoonni gidi mooleenna diilallo adhite hadhanno.

⁸Abbayi Wayi giddonni qulxu'me woshshaaxxite galtinori raarte wi'litanno; woshshaadonsanna qarawinsa mullare ikkanno.

⁹Shalaalatenni uddano gantannori assitannore hoogge, hexxo mudhitanno.

¹⁰Uddano gantannori gara habbanno; kiranyootuno yaadde wi'litanno.

¹¹Tsoaani Katami gashshaano gowwootaho; Gibitsete hayyoole kaa'lannokki mala uyitanno. Hiitto yite, «Ninke egennaammaho; albi mootoollara aanneemmoreeti» yitannoyya?

¹²Gibitsete moote! Olantote Magani gobbakkira malinore kultannoheha ikkannona, hakkuri egennaammu amaalaasinekki mama no?

¹³Tsoaani gashshaano gowwitino; Memfiisi albisooti dogantino; roorrootinsa mannansa so'risiissino.

¹⁴Umiweelo mala maltanno gede assinohu Kaaliiqaati. Gibitse baalanka coye sodhe tufisi shalaqisheennasi uwara gatantaranno dimbaanchi gede ikkitanno.

¹⁵Gibitsete dureessu woy buxichu, maccahu woy moofu mittoreno asse diafanno.

¹⁶Hakko barra Gibitsootu waajjite meyate gede ikkitanno. Olantote Mootichi qorichishansara anga gotti assanno woyite waajjite huxidhanno.

¹⁷Yihudu manni Gibitse waajjishiishanno. Olantote Mootichi qorichishansara kainota affino daafira, Yihudu su'ma gannanni woyite nafa massanno.

¹⁸Hakka waro 5 katamma Gibitsennitera hee'ranno manni Ibiraawootu afiinni coyi'ranno. Olantote Mootichi su'minni xaartanno. Hatte katamma giddonni mitto, Arrishshote Katamaati yinanni.

¹⁹Hakka waro Gibitsete baattora Kaaliiqira Kakkalote Darga seekkinanni; tenne gobba qaccerano isira sooddicha uurrinsanni.

²⁰Kuri Olantote Mootichi Gibitsete gobbara hee'rasira malaate ikkitanno. Hakko hee'ranno manni amadannonsa qarri daafira Kaaliiqiwa hige raaranno. Isino kaa'lannonsaha soye diininsa anganni gatisannonsa.

²¹Kaaliiqi Gibitsete mannira isonoo egensiisanno; insano Kaaliiqa egente heedhanno. Kakkalonna fushshaate shiqishshannosi. Kaaliiqira xanono xa'nitanno; xanonsano uyidhanno.

²²Kaaliiqi Gibitsoota qorichishanno; insano isiwa higganno. Huuccattonsa macciishshe galagalche hursannonsa.

²³Hatte yannara Gibitsetenna Asoori mereero hala'lado doogo fultanno. Tini lamenti gosa mimmitunniwa hadhe, mitteenni magansidhanno.

²⁴Hakka waro Israeele, Gibitsetenna Asoori aana lexxite sayikki ikkiteenna, gobba gosate maasso abbitannore ikkitanno.

²⁵Olantote Mootichi, «Ki'ne Gibitsete heedhinannire manna'ya, kalaqoommore Asoorootanna doodhoommore Israeele maassi'reemmo» yaanno.